Almatyda brıtandyq Coventry University jańa kampýsy ashylady

ASTANA. KAZINFORM — London qalasynda Coventry University (Ulybrıtanııa) men Coventry University Kazakhstan (Qazaqstan) arasynda ózara túsinistik týraly memorandýmǵa qol qoıyldy, dep habarlaıdy Ǵylym jáne joǵary bilim mınıstrliginiń baspasóz qyzmeti.

Qujatqa sáıkes brıtandyq joǵary oqý ornynyń jańa kampýsyn 2026 jylǵy qyrkúıek aıynda Almaty qalasynda ashý josparlandy.

Kampýs Ulybrıtanııadaǵy Coventry University-diń akademııalyq standarttary men zertteý tásilderi negizinde jumys isteıdi. Ýnıversıtet ınjenerlik bilim berý mektebiniń joǵary deńgeıimen, zamanaýı zertteý ınfraqurylymymen jáne jasandy ıntellekt salasyndaǵy ozyq ázirlemelerimen halyqaralyq deńgeıde tanymal.

Jańa bilim ordasy Ortalyq Azııadaǵy aldyńǵy qatarly brıtandyq ınjenerlik ýnıversıtetterdiń birine aınalýdy kózdeıdi. Oqý baǵdarlamalary álemdik akademııalyq standarttarǵa sáıkes ázirlenip, ınjenerlik pánder men jasandy ıntellekt tehnologııalaryn keshendi qamtıdy. Professor-oqytýshylar quramy óndiristik tájirıbesi mol, bilikti mamandardan jasaqtalmaq.

Bakalavrıat deńgeıinde «Sáýlettik tehnologııalar», «Qurylys jobalaryn basqarý» jáne «Kompıýterlik júıeler ınjenerııasy» bilim berý baǵdarlamalaryn iske qosý josparlanyp otyr. Magıstratýrada «Elektromobılder ınjenerııasy» jáne «Basqarý júıeleri, robototehnıka jáne zııatkerlik avtomattandyrý» baǵyttary boıynsha mamandar daıarlaý kózdelip otyr.

Kelisimge qol qoıý rásiminde Coventry University Kazakhstan prezıdenti Mıras Dáýlenov bul bastama kadrlyq áleýetti nyǵaıtýǵa jáne eldiń tehnologııalyq damýyna eleýli úles qosýǵa múmkindik beretinin alǵa tartty.

— Búginde Memleket basshysynyń jańa tehnologııalardy engizý jónindegi tapsyrmalary aıasynda elimizge zamanaýı tehnologııalarmen jumys isteı alatyn ári ınnovatsııalyq sheshimderdi tıimdi júzege asyrýǵa qabiletti ınjener mamandar asa qajet. Osyǵan baılanysty halyqaralyq tájirıbege, qoldanbaly bilim men ozyq noý-haýǵa basymdyq bere otyryp, ınjener kadrlardy jańa deńgeıde daıarlaý mańyzdy. Almaty qalasynda Coventry University kampýsynyń ashylýy osy baǵyttaǵy mańyzdy qadam bolmaq. Bul bastama kadrlyq áleýetti nyǵaıtýǵa jáne eldiń tehnologııalyq damýyna eleýli úles qosýǵa múmkindik beredi, — dep atap ótti.

Almatydaǵy Coventry University Kazakhstan Qazaqstan aýmaǵyndaǵy Coventry University Group quramyna kiretin ekinshi kampýs bolmaq. Buǵan deıin 2024 jyly Astana qalasynda ýnıversıtettiń alǵashqy kampýsy iske qosylǵan. Qazir onda elimizdiń ár óńirinen kelgen 400-den astam stýdent «Bıznes», «Kompıýterlik ǵylymdar», «Halyqaralyq qatynastar», «Ekonomıka jáne qarjy» baǵyttary, sondaı-aq MBA Global Business (Executive) magıstrlik baǵdarlamasy boıynsha bilim alady.

Aıta keteıik, Coventry University 1843 jyly qurylǵan. Qazirgi ýaqytta ýnıversıtet Ulybrıtanııada jáne Eýropa men Azııada mamandar daıarlaý sapasy boıynsha joǵary baǵalanady.

Osyǵan deıin Qazaqstan men Ulybrıtanııa arasyndaǵy strategııalyq seriktestik jol kartasy bekitilgenin jazǵanbyz.