Almatyda bir túnde kóktaıǵaqqa qarsy 500 tonnadan astam materıal sebildi
ALMATY. KAZINFORM — 8 jeltoqsanǵa qaraǵan túni Almatynyń taý bókterindegi aýdandarynda qar jaýyp, kún sýytty.
«Qazgıdromet» RMK dereginshe, 9 jeltoqsanda jańbyr, jabysqaq qar, tuman túsip, jel kúsheıip, kóktaıǵaq paıda bolýy múmkin. Al 10 jeltoqsanǵa qaraǵan túni qalada 6-9 sm, al taýly aımaqta 15-20 sm-ge deıin qar túsetini boljanǵan.
— 8 jeltoqsan túninde kóshe-jol jelisine kóktaıǵaqtyń aldyn alý maqsatynda arnaıy qospalar sebildi. Jumys táýlik boıy uıymdastyrylyp, arnaıy tehnıka men jedel brıgadalar jumyldyryldy, — dep habarlady ákimdiktiń baspasóz qyzmeti.
Ákimdiktiń málimetinshe, túngi jumys kezinde 1 000-nan astam arnaıy tehnıka, 2,7 myń jumysshy jáne 75 jedel brıgada kezekshilik atqardy. Eńiste, dóńde jáne kóktaıǵaq jıi paıda bolatyn aımaqtarǵa patrýldik baqylaý kúsheıtildi. Almaty qutqarý qyzmeti 15 tehnıka men 50 qyzmetkerdi, tótenshe jaǵdaılar departamenti 53 tehnıka men 244 qyzmetkerdi tartty.
— Jumys barysynda barlyǵy 553,4 tonna kóktaıǵaqqa qarsy materıal qoldanyldy. Eń aýqymdy jumys kóktaıǵaq qaýpi joǵary sanalatyn Bostandyq jáne Medeý aýdandarynda júrgizildi, — dep habarlady qala ákimdigi.
Almaty ákimdigi, aýdan ákimdikteri, Kommýnaldyq ınfraqurylym jáne turǵyn úı ınspektsııasy basqarmasy, polıtsııa departamenti, «Almaty Tazalyq» kásiporny jáne merdiger uıymdar joldyń jaıyn táýlik boıy baqylap otyr. Aldaǵy kúnderi aýa temperatýrasy tómendegen jaǵdaıda magıstraldyq kóshelerge qosymsha qospa sebiledi.
Eske salaıyq, buǵan deıin Almatyda jaýyn-shashynǵa baılanysty kommýnaldyq qyzmet kúsheıtilgen jumys rejımine kóshkenin habarlaǵanbyz.