Almatyda bir túnde 6 mas júrgizýshi ustaldy
ALMATY. KAZINFORM — Almatyda jol qaýipsizdigin arttyrýǵa baǵyttalǵan respýblıkalyq «Qaýipti júrgizýshi» jedel-profılaktıkalyq is-sharasy ótkizilip jatyr.
Qalalyq polıtsııa departamentiniń málimetinshe, ótken táýlikte tártip saqshylary masań kúıde kólik basqarǵan 6 júrgizýshini ustaǵan. Odan bólek memlekettik nómirsiz júrgen 12 avtokólikti, sondaı-aq jalǵan nómir qoıylǵan 2 kólikti jáne ózge de birqatar óreskel quqyq buzýdy anyqtaǵan.
— Jol qaýipsizdigi máseleleri jumysymyzdyń basym baǵyttarynyń biri. Patrýldik ekıpajdar kúsheıtilgen tártipte qyzmet atqaryp jatyr. Jol apatyna tikeleı áser etetin óreskel zań buzý boıynsha baqylaý aıtarlyqtaı kúsheıtildi, — dedi ákimshilik polıtsııa basqarmasy bastyǵynyń orynbasary Tımýr Serikuly.
Polıtsııa qala turǵyndary men qonaqtaryn jol qozǵalysy erejelerin qatań saqtaýǵa shaqyrdy.
Eske salaıyq, buǵan deıin Almatyda iri jol apatynan úsh adam zardap shekti.