Almatyda bir túnde 27 santımetr qar jaýdy
ALMATY. KAZINFORM – Almatyda qar 10 naýryz kúni keshke jaýa bastady. Qar jaýa bastaǵan sátten bastap qalanyń kommýnaldyq qyzmeti kúsheıtilgen tártipte jumys isteýge kóshti.
«Qazgıdromet» RMK málimetine sáıkes, jaýyn-shashyn aldymen jańbyr túrinde bastalyp, keıin qarǵa ulasyp, 11 naýryz kúni tańǵa deıin jalǵasty. Osy ýaqyt aralyǵynda qalaǵa shamamen 27 santımetr qar tústi.
Almaty kommýnaldyq ınfraqurylym jáne turǵyn úı ınspektsııasy basqarmasynyń málimetinshe, joldaǵy qaýipsizdikti qamtamasyz etý úshin kóshelerge 75 jedel brıgada, 2 710 jol salasy jumysshysy jáne 1 225 arnaıy tehnıka jumyldyryldy. 200-den astam sypyrý tehnıkasy jolǵa kóktaıǵaqqa qarsy materıaldardy seýip júr. Sebý jumystary aıaqtalǵannan keıin tehnıka 28 kolonnaǵa biriktirilip, magıstraldyq kóshelerdi tazalaýǵa kirisedi.
– Túnnen bastap qalanyń negizgi magıstraldarynda qardy jınaý jumystary qolǵa alyndy. Jumys jol polıtsııasynyń patrýldik kólikteriniń kómegimen tehnıka kolonnalary arqyly istelip jatyr. Sonymen qatar shaǵyn kólemdi tehnıka men jumysshylar trotýarlardy, qoǵamdyq kólik aıaldamalaryn, jerústi ótkelderin, baspaldaqtar men pandýstardy tazalaıdy, - delingen habarlamada.
Sınoptıkterdiń boljamynsha, 11 naýryz kúni kúndiz jaýyn-shashyn bolmaıdy, aýa temperatýrasy –6…–8 gradýs shamasynda bolady, keıin taǵy tómendeıdi.
Eske salaıyq, buǵan deıin Almatyda 2 700 jumysshy men 1 200 tehnıka qar tazalap jatqanyn jazǵanbyz.