Almatyda bir túnde 1,2 myń tekshe metr qar shyǵaryldy
ALMATY. KAZINFORM – Almatynyń kommýnaldyq qyzmetteri túnimen qalany qardan tazalady.
Kúndiz qala kóshelerinde 605 arnaıy tehnıka jáne 1080 jol jumysshysy jumys isteıtin bolady. Kóktaıǵaqtyń aldyn alý úshin negizgi kósheler suıyq reagenttermen óńdeldi.
– 16 jeltoqsanda tańerteń jol qyzmetteri kóshelerdi qaıta tazartýdy bastady. Jumysqa polıtsııanyń patrýldik mashınalarymen birge júretin 23 tehnıka kolonnasy jumyldyryldy. Respýblıka alańyn, áýejaıdy jáne Almaty-1 jáne Almaty-2 temirjol vokzaldaryn qosa alǵanda, negizgi qalalyq nysandar mańynan 1200 tekshe metr qar shyǵaryldy,–dep habarlady ákimdikten.
Budan bólek, trotýarlardy, turaq aımaqtaryn jáne áleýmettik mańyzdy obektilerge kireberisterdi jınaý úshin 65 shaǵyn tehnıka jumyldyryldy. Sondaı-aq qoǵamdyq kólik aıaldamalaryn, jaıaý júrginshiler ótkelderin, baspaldaqtar men pandýstardy qolmen tazalaý jumystary júrgizilip jatyr.
Qazgıdromettiń boljamy boıynsha qalada qardyń qalyńdyǵy 16 jeltoqsan kúni tańǵy 10-ǵa deıin saqtalady, keı jerlerde tuman túsýi múmkin. Kúndiz -6...-8 °C deıin sýyq bolady dep kútilýde.
Osyǵan deıin Almatynyń kommýnaldyq qyzmetteri qardyń túsýine baılanysty kúsheıtilgen rejımge kóshkeni týraly jazǵan edik.
