Almatyda bir top adam Qytaı azamattarynan 5,5 mln teńge bopsalaǵan

ALMATY. KAZINFORM – Almatyda ózderin quqyq qorǵaý organy qyzmetkerimiz dep tanystyrǵan bir top adam sheteldik azamattardy aldap, aqsha bopsalaǵan.

Almaty polıtsııa departamentiniń habarlaýynsha, kúdiktiler Qytaı Halyq Respýblıkasynyń azamattarynan shamamen 5,5 mıllıon teńge alǵan.

Tergeý málimetinshe, olar aldyn ala kelisip áreket etip, kóshede júrgen sheteldikke jaqyndap, ózin polıtseımin dep tanystyrǵan. Keıin olardyń ýaqytsha turyp jatqan mekenjaıyna birge baryp, aqsha talap etken.

Jedel-izdestirý is-sharalary nátıjesinde kúdiktilerdiń bári ustalyp, ýaqytsha ustaý ızolıatoryna qamaldy. Alataý aýdandyq polıtsııa basqarmasynyń bastyǵy Edilhan Baıǵaraev bul qylmys dereý áshkere bolǵanyn aıtty.

– Biz kúdiktilerdiń ózin polıtsııa qyzmetkeri retinde tanystyryp, azamattardy aldap, aqsha talap etý áreketin der kezinde toqtattyq. Qazirgi ýaqytta bopsalaý deregi boıynsha qylmystyq is qozǵaldy, - dedi Baıǵaraev.

Qalalyq polıtsııa departamenti kúdiktilerdiń ózge de qylmystarǵa qatysy bar-joǵyn tekserip jatyr.

Eske salaıyq, buǵan deıin Almatyda úsh kúdikti áleýmettik jeli arqyly adamdardy aldap, aqsha bopsalaǵanyn jazǵanbyz.