Almatyda bir táýlikte qalyńdyǵy 15 sm qar tústi
ALMATY. KAZINFORM – Almatyda bir tún ishinde 520 m3 qar syrtqa shyǵaryldy.
Almatyda 14 naýryz kúni saǵat 15:30-dan 15 naýryz tańǵy saǵat 05:00-ke deıin qalyńdyǵy 15 sm qar jaýdy. Almaty ákimdiginiń málimetinshe, túngi ýaqytta 367 birlik tehnıka jáne 171 jumysshy qar tazalaýǵa jumyldyryldy.
«148 qum taratqysh arqyly kóktaıǵaqqa qarsy materıaldar sebildi. Saǵat 07:00-degi jaǵdaı boıynsha 1193 tonnasy qoldanyldy. Saǵat 20:30-dan 06:00-ge deıin jol patrýldik polıtsııa kóliginiń erip júrýimen 16 kolonna tehnıka jolldy qardan tazalady. Saǵat 07:00-degi jaǵdaı boıynsha 520 m3, al qys boıy 367,8 myń m3 qar syrtqa shyǵaryldy. Tańǵy qarbalas ýaqyttan keıin qar shyǵarý jumystary jalǵasady», - dep habarlady ákimdikten.
Sondaı-aq, qazirgi ýaqytta shaǵyn kólemdi 160 trotýar tehnıkasy trotýarlar men jalpy aımaqtardy tazartyp jatyr. Áleýmettik mańyzdy nysandarǵa kireberister, qoǵamdyq kólik aıaldamalary jáne jer ústi jaıaý júrginshiler ótkelderi kúrelip jatyr.
Saǵat 08.00-den bastap 394 arnaıy tehnıka, onyń ishinde 145 qum taratqysh, 169 trotýardaǵy qardy kúreıtin tehnıka men 602 jumysshyny jumyldyrý josparlandy.
Qazgıdromettiń boljamynsha búgin kúndiz aýa temperatýrasy 0-… +2 gradýs aralyǵynda, jaýyn-shashyn bolmaıdy dep kútiledi.
Eske salaıyq, Almatyda keshe tústen keıin aýa raıy kúrt nasharlap, boran soǵyp, qar jaýa bastady. Sonyń saldarynan Almatyda 10 baldyq kólik keptelisi paıda bolǵan edi.
Sondaı-aq Almaty áýejaıynda aýa raıynyń qolaısyzdyǵyna baılanysty Almatydan Shymkentke, Astanaǵa, Aqtaýǵa, Atyraýǵa, Qaraǵandyǵa, Úrimshige, Beıjińge, Delıge ushatyn reıster keshikken edi.
