Almatyda bir táýlikte 2 myńnan astam zań buzýshylyq toqtatyldy

ALMATY. KAZINFORM – Almaty qalasynda 1 sáýirden bastap jol qaýipsizdigin qamtamasyz etý jáne quqyq buzýshylyqtardy azaıtý maqsatynda «STOP buzýshylyq» atty aýqymdy jedel-profılaktıkalyq is-sharasy júrgizilip jatyr. 

QR Іshki ister mınıstrliginiń málimetinshe, is-sharanyń alǵashqy kúni jol qozǵalysy erejelerin buzýdyń 2 200-den astam faktisi tirkeldi. Negizgi nazar aýyr quqyq buzýshylyqtarǵa aýdaryldy, onyń ishinde mas kúıinde kólik júrgizý, qarsy jolaqqa shyǵý jáne júrgizýshi kýáliginsiz kólik basqarý oqıǵalary anyqtaldy.

Sonymen qatar elektr samokattaryn paıdalaný jaǵdaılary qatań baqylaýǵa alyndy. Bir táýlik ishinde shamamen 400 quqyq buzýshylyq anyqtalyp, olardyń arasynda kámeletke tolmaǵandardyń elektr samokattaryn basqarýy da bar. Bul faktiler boıynsha ata-analarǵa qatysty tıisti sharalar qabyldandy.

Arnaıy aıyp turaǵyna shamamen 1 000-ǵa jýyq kólik qoıyldy.

Almaty qalasy polıtsııa departamenti bastyǵynyń orynbasary Ǵalym Sarǵulovtyń aıtýynsha, basty maqsat – quqyq buzýshylyqtardy anyqtaý ǵana emes, joldarda qaýipsiz orta men tártip qalyptastyrý.

– Biz barlyq jol qozǵalysyna qatysýshyny erejelerdi qatań saqtaýǵa jáne jeke ári ata-analyq jaýapkershilikti umytpaýǵa shaqyramyz. Joldaǵy qaýipsiz minez qulyq mádenıetin qalyptastyrý – ortaq mindet. Barlyq baǵyt boıynsha baqylaý kúsheıtildi, apattylyq deńgeıin tómendetýge júıeli túrde jumys júrgiziledi, - dedi ol.

Eske salsaq, budan buryn SQO-da ár úshinshi quqyqbuzýshylyq mas kúıde jasalatynyn jazǵanbyz.