Almatyda bir páterge 44 adam tirkelgen

ALMATY. KAZINFORM — Almatyda kóshi-qon qyzmetiniń qyzmetkerleri bir mekenjaıǵa azamattardy jappaı tirkeý faktilerin anyqtady.

Polıtsııanyń málimetinshe, tekserý kezinde qalanyń eki aýdanyndaǵy eki turǵyn úıde osyndaı jaǵdaı tirkeldi. Bir páterde 44 adam, ekinshisinde 16 adam tirkelgenimen, olardyń bul mekenjaıda naqty turmaıtyny belgili boldy.

Árbir derek boıynsha tekserý júrgizilip, materıaldar zańnamaǵa sáıkes shara qabyldaý úshin joldanady.

Polıtsııa málimetinshe, mundaı «rezeńke páterler» qoǵamdyq jáne kóshi-qon qaýipsizdigine qaýip tóndiredi. Olar zańsyz bolýdy zańdastyrý, naqty turǵylyqty jerdi jasyrý jáne ózge de quqyq buzýshylyqtarǵa jaǵdaı jasaý maqsatynda paıdalanylýy múmkin.

Almaty polıtsııa departamenti kóshi-qon qyzmeti basqarmasynyń bastyǵy Erkin Amantaevtyń aıtýynsha, jalǵan tirkeý — formaldylyq emes, qaýipsizdik máselesi.

— Jalǵan tirkeý baqylaýdan jaltarý quralyna aınalyp, qoǵamdyq tártipke qaýip tóndiredi. Qaýipsizdik ashyqtyqtan bastalady. Úıde naqty kimniń turyp jatqanyn bilý — quqyq buzýshylyqtardyń aldyn alýdyń mańyzdy tetigi, — dedi ol.

Polıtsııa jalǵan tirkeýdi rásimdegen azamattarǵa da, óz mekenjaıyn zańsyz tirkeý úshin usynǵan turǵyn úı ıelerine de zańnamaǵa sáıkes jaýapkershilik qarastyrylǵanyn eske saldy. Mundaı tekserýler qalanyń barlyq aýdanynda jalǵasady.

Eske salaıyq, buǵan deıin Almatyda bir bólmeli páterde 109 adam tirkelgenin jazǵanbyz.