Almatyda bir otbasy kómirqyshqyl gazynan ýlandy

ALMATY. KAZINFORM – Almatyda bir otbasy kómirqyshqyl gazyna ýlanyp qaldy.Onyń ishinde úsh bala bar.

Almaty qalalyq Tótenshe jaǵdaılar departamentiniń málimetinshe, búgin, 15 aqpanda saǵat 13:40-ta 112 pýltine jedel medıtsınalyq járdem qyzmetinen Naýryzbaı aýdanynyń «Shuǵyla» shaǵyn aýdanynda kómirqyshqyl gazyna ýlanyp qalǵan adamdar týraly aqparat tústi.

Medıtsına qyzmetkerleri otbasy músheleriniń, onyń ishinde 3 balanyń jaǵdaıy turaqty ekenin aıtty. 

«Eresek adamdar aýrýhanaǵa jatýdan bas tartty, biraq balalar dárigerlerdiń qaraýynda qaldy. Qazirgi tańda olardyń ómiri men densaýlyǵyna eshbir qaýip joq»,- delingen habarlamada.

Departamentten atap ótkendeı, josparǵa sáıkes jylytý maýsymy aldynda órt qaýipsizdigi týraly nusqaýmen 164 myńnan astam úı qamtylǵan.

«Órt qaýipsizdigi erejeleriniń 28 myńnan astam buzýshylyǵy anyqtaldy (avtonomdy jylytý júıelerimen, elektr jelileri men jabdyqtaryn paıdalanýǵa baılanysty órt qaýipsizdigi salasynda buzýshylyqtar jáne t.b.). Anyqtalǵan buzýshylyqtardy joıý boıynsha jeke turǵyn úı ıelerine usynymdar berildi»,- dep habarlady Almaty qalalyq TJD.

Qutqarýshylardyń aıtýynsha, úıdiń ishi sýyp ketpeý úshin jeke sektor turǵyndarynyń basym bóligi uıyqtar aldynda peshtiń aýzyn ýaqtyly ashpaıdy.

«Bul ýly gazdyń taralýyna sebep. Onyń túsi, ıisi joq, biraq adam ómirine óte qaýipti»,- dep eskertti sala mamandary.