Almatyda bir mektep qyzylshaǵa baılanysty qashyqtan oqýǵa kóshti

Almatyda №172 mekteptiń bastaýysh synyp oqýshylary arasynda qyzylsha aýrýy anyqtaldy, dep habarlaıdy QazAqparat tilshisi.

Almaty qalalyq bilim basqarmasynyń málimetinshe, 20 qyrkúıek kúni Medeý aýdany, sanıtarlyq-epıdemıologııalyq bóliminiń mamandary «Qyzylsha» ınfektsııasyn juqtyrý faktileriniń anyqtalýyna baılanysty bastaýysh synyp oqýshylaryn ınkýbatsııalyq kezeńniń sońyna deıin, ıaǵnı, 2023 jyldyń 16 qazanyna deıin qashyqtan oqýǵa kóshirý usynyldy.

«№172 mektep dırektory usynystardy eskerip, ınfektsııanyń odan ári taralýyna jol bermeý úshin barlyq bastaýysh synyp oqýshylaryn (1-4) ınkýbatsııalyq kezeńniń sońyna deıin onlaın oqytýǵa kóshirý týraly sheshim qabyldady. Muǵalimder men ata-analar arasynda túsindirý jumystary júrgizildi. Balalar qajetti kompıýterlik tehnıkamen jáne ınternet resýrstarymen qamtamasyz etildi»,- dep habarlady basqarmadan.

Qalalyq ákimdik ókilderi, megapolıstegi qalǵan barlyq mektepte epıdemıologııalyq jaǵdaı turaqty jáne epıdemıologtardyń baqylaýynda ekenin atap ótti.

Almaty qalalyq sanıtarlyq-epıdemıologııalyq baqylaý departamentiniń málimeti boıynsha, balalar arasynda aýrýǵa shaldyǵý kórsetkishi negizinen ekpe almaǵandar arasynda tirkeledi. Profılaktıkalyq jáne epıdemııaǵa qarsy is-sharalardy sanıtarlyq-epıdemıologııalyq qyzmet mamandary júrgizedi.