Almatyda bir bólmeli páterde 109 adam tirkelgen

ALMATY. KAZINFORM – Almaty prokýratýrasy zańsyz kóshi-qondy uıymdastyrý deregin anyqtady. Tekserý barysynda bir bólmeli páterde naqty turmaıtyn 109 adamnyń tirkelgeni belgili boldy. 

Prokýratýra málimetinshe, páter ıesi azamattardy syıaqy alý maqsatynda jalǵan tirkeýge qoıǵan.

Atalǵan derek boıynsha páter ıesine qatysty Qazaqstan Respýblıkasy Qylmystyq kodeksiniń 394-baby – «Zańsyz kóshi-qondy uıymdastyrý» boıynsha qylmystyq is qozǵaldy. Sot úkimimen ol bir jyl merzimge bas bostandyǵyn shekteý jazasyna tartyldy.

Almaty prokýratýrasy mundaı áreketterdiń qylmystyq jaýaptylyqqa ákeletinin eskertti. Qadaǵalaý organy azamattardy kóshi-qon zańnamasynyń talaptaryn qatań saqtaýǵa úndedi.

Eske salaıyq, buǵan deıin elimizde kóshi-qon aǵynyn taldaý ortalyǵy qurylyp jatqanyn habarlaǵanbyz.