Almatyda bir baǵytty kóshelerdiń sany kóbeıýi múmkin

Máselen, 2025 jyly megapolıstegi 10 kóshe qıylysynda «vafeldi» jol belgisi paıda boldy. Bul arnaıy jol tory qıylystyń retteletin aımaǵyn kórsetip, keptelis kezinde joldy bógep qalýdyń aldyn alýy tıis edi.

Almaty qalasy jol qozǵalysy jáne jolaýshylar kóligin uıymdastyrý basqarmasyna bul sheshimniń qanshalyqty tıimdi bolǵanyn surap, redaktsııamyz saýal joldady.

Vedomstvo «Qıylys aımaǵyn belgileý» (vafeldi tańbalaý) jol tańbasy - keptelis kezinde kóliktiń jol qıylysyna shyǵýyna jol bermeýine baǵyttalǵanyn atap ótti. Sebebi óz baǵyty boıynsha baǵdarshamnyń qyzyl túsi janyp, jol ortasynda toqtap qalǵan kólikter kóldeneń baǵyttaǵy qozǵalysqa kedergi keltiredi.

- Negizgi maqsat - keptelisterdi azaıtý, ásirese, qarbalas ýaqytta kóliktiń úzdiksiz qozǵalysyn qamtamasyz etý jáne júrgizýshilerdiń tártibin jónge keltirý, - dep túsindirdi basqarma mamandary.

Alaıda resmı jaýapta «vafeldi» jol belgisiniń tıimdiligi týraly statıstıka men ózge derekter berilmedi. Vedomstvo tek jol torynda qalyp qoıǵan kólikterge aıyppul salý máselesi sheshilip jatqanyn naqtylady.

Qazirgi ýaqytta «Kórkem Telekom» JShS-niń «Sergek Almaty» fılıaly men Almaty qalasy polıtsııa departamenti birlesip, quqyqbuzýshylyqtyń atalǵan túrin derekterdi óńdeý júıesine engizý úshin QR Bas prokýratýrasynyń Quqyqtyq statıstıka jáne arnaıy esepke alý jónindegi komıtetine usynys joldanǵan.

- Qazirgi ýaqytta atalǵan aıyppul túrin resmı túrde iske qosý úshin Bas prokýratýradan ruqsat alý kerek. Oń sheshim qabyldanǵan jaǵdaıda «vafeldi tańbalaý» jumystary qalanyń basqa da jaıaý júrginshiler kóp júretin qıylystarynda uıymdastyrylatyn bolady, - delingen jaýapta.

Jaıaý júrginshilerge arnalǵan baǵdarsham fazasy

Bıyl aqpan aıynda Almatyda júktemesi joǵary birqatar jol qıylysynda qozǵalys syzbasyn túzetý boıynsha pılottyq joba qolǵa alyndy. Joba aıasynda júrginshiler men kólik qozǵalysyna arnalǵan jekelegen baǵdarsham fazalary engizildi.

Ózgerister Nazarbaev dańǵyly — Gogol kóshesi, Abylaı han dańǵyly — Gogol kóshesi, Dostyq dańǵyly — Abaı dańǵyly, Seıfýllın dańǵyly — Maqataev kóshesi, Abaı dańǵyly — Altynsarın dańǵyly jol qıylystarynda engizilgen. Bul sheshimniń nátıjesi boıynsha da agenttik jaýapty vedomstvoǵa júgindi.

Almaty qalasy jol qozǵalysy jáne jolaýshylar kóligin uıymdastyrý basqarmasynyń jaýabyna sáıkes, atalǵan ýchaskelerde jaıaý júrginshiler joldan ótkende barlyq baǵyttaǵy kólik toqtaıdy. ıAǵnı, adamdar ońǵa nemese solǵa burylatyn kólikterge kedergi keltirmeıdi jáne ózderi joldan qaýipsiz óte alady.

- Bul joldardyń ótkizý qabiletine oń áserin tıgizedi, sebebi júrgizýshilerge jaıaý júrginshilerdi kútýdiń qajeti bolmaıdy jáne baǵdarshamnyń ruqsat beretin belgisi janǵan kezde qıylystan jyldamyraq óte alady. Qazirgi ýaqytta atalǵan jumys shemasy taldaý kezeńinde. Onyń tıimdiligi rastalǵan jaǵdaıda jaıaý júrginshiler kóp júretin basqa da qalalyq qıylystarda osyndaı bólek fazalardy engizý josparlanyp otyr, - dep tolyqtyrdy vedomstvodan.

Bir baǵytty qozǵalys

Sondaı-aq jol qozǵalysy jáne jolaýshylar kóligin uıymdastyrý basqarmasy qala joldaryndaǵy jaǵdaıdy jaqsartý úshin bir baǵytty kóshelerdiń sany artýy múmkin ekenin habarlady.

- Qazirgi tańda qala kóshelerinde bir baǵytty qozǵalysty uıymdastyrý múmkindigi qarastyrylyp jatyr. Bul shara jol qozǵalysyn ońtaılandyrýdyń jáne joldardaǵy qaqtyǵys núktelerin azaıtýdyń bir tásili retinde zerttelip jatyr. Degenmen, bul - másele aldyn ala talqylaý satysynda ekenin túsiný mańyzdy. Naqty ýchaskelerde bir baǵytty qozǵalysty engizý týraly túpkilikti sheshim kólik aǵyndaryna jan-jaqty taldaý júrgizilip, barlyq qyzmettermen tolyq kelisilgen jaǵdaıda qabyldanady, - delingen basqarma jaýabynda.

Eske salaıyq, 2018 jyly Almatynyń birneshe kóshesine bir baǵytty qozǵalys engizilgen bolatyn. Ol kezde Jambyl, Qarasaı batyr, Qabanbaı batyr, Bógenbaı batyr, Gogol, Muratbaev jáne Sháripov kósheleriniń baǵytty bekitildi.