Almatyda bir aıda eki úshem dúnıege keldi
ALMATY. KAZINFORM — Almatynyń perınataldyq ortalyǵynda bir aıdyń ishinde eki úshem dúnıege keldi.
Qoǵamdyq densaýlyq saqtaý basqarmasynyń málimetinshe, 14 tamyzda 27 jastaǵy turǵyn Móldir Sovethanova úshemniń anasy atandy. Nárestelerdiń ekeýi ul, bireýi qyz. Bul almatylyq áıeldiń ekinshi júktiligi bolǵan. Sábılerge Aıhan, Aıbyn jáne Aıza esimderi berildi. Týǵan kezdegi salmaqtary — 1800, 1480 jáne 1400 gramm boldy.
— Ýaqytyly jáne bilikti medıtsınalyq kómektiń arqasynda nárestelerdiń jaǵdaıyn turaqtandyrýǵa múmkindik týdy. Nárestelerdiń reanımatsııa jáne qarqyndy terapııa bóliminde em alǵannan keıin sábıler joǵary táýeldiliktegi náresteler bólimine aýystyryldy. Qazirgi ýaqytta munda olardy odan ári baqylaý jáne kútý jumystary jalǵasyp jatyr, — dep habarlady vedomstvo.
Ekinshi úshem 31 tamyzda Rahat Bıgeldıevanyń otbasynda dúnıege keldi. Náresteler merziminen buryn júktiliktiń 32-aptasynda kesar tiligi arqyly dúnıege kelgen. Otbasy eki qyz jáne bir ulmen tolyqty. Ata-anasy sábılerge Ahmet, Halıma jáne Amına esimderin berdi. Uldyń týǵan kezdegi salmaǵy 1998 gramm, qyzdardyń salmaǵy 1412 jáne 1347 gramm boldy.
— Qazir úsh sábı reanımatsııa jáne qarqyndy terapııa bóliminiń dárigerleriniń baqylaýynda. Olarǵa qajetti medıtsınalyq kómek kórsetilip, SRAR apparatynyń kómegimen ınvazıvti emes tynys alý qoldaýy júrgizilip jatyr, — dep habarlady basqarma ókilderi.
Dárigerlerdiń aıtýynsha, búginde basty mindet — balalardyń jaǵdaıyn turaqtandyryp, shıraýyna jáne qajetti salmaq qosýyna kómektesý. Aldaǵy ýaqytta balalardyń jaǵdaıy turaqtanǵan soń, úılerine shyǵarý josparlanǵan.
Jalpy 2026 jyldyń basynan beri Almatynyń Perınataldyq ortalyǵynda tórt úshem dúnıege keldi. Alǵashqy eki úshem qańtar jáne aqpan aılarynda týǵan.
Eske salaıyq, Pavlodarda bıyl ekinshi márte úshem dúnıege keldi.
