Almatyda bir adamnyń ómirin qıǵan avtobýs apatyna qatysty sot otyrysy bastaldy

ALMATY. KAZINFORM – Almatyda «5:32» serıalynyń prodıýseri sebepker bolǵan jol apatyna qatysty sot otyrysy bastaldy.

Іs Almaly aýdandyq sotynda QR Qylmystyq kodeksiniń 345-babynyń 3-bóligi boıynsha qaralyp jatyr. 28 jastaǵy áıelge kólik quralyn basqarý kezinde jolda júrý qaǵıdalaryn buzý, onyń ishinde abaısyzda adam ólimine ákep soǵý baby boıynsha aıyp taǵylyp otyr. 

Aldyn ala tyńdalym barysynda aıyptalýshynyń advokattary tergeýde protsessýaldyq qatelikter jiberilgenin málim etip, isti prokýrorǵa qaıtarýdy surady. Aıtýlarynsha, is materıaldarymen tolyq tynysýǵa múmkindik ala almaǵan. 

«Sarapshylardyń qorytyndysyn iske qosý týraly qorǵaý ótinishi negizgi sot talqylaýy barysynda qaralyp, sheshiletin bolady. Іs materıaldarymen tanysý týraly ótinish qosymsha ýaqyt bere otyryp qanaǵattandyryldy», - dedi sýdıa. 

Sýdıa sot otyrysyn 19 qarasha tańǵy saǵat 10:30-ǵa belgiledi.

Eske salaıyq, 26 maýsym kúni qoǵamdyq kólik pen jeńil mashına soqtyǵysqan edi. Saldarynan 16 adam jaraqat alyp, 1 adam qaza tapty. 

Keıin qoǵamdyq kólik kamerasy túsirgen beınejazba jelide tarady. 

Avtobýstyń apatqa ushyraýyna «5:32» serıalynyń prodıýseri sebepker bolǵan. 

Keıin kúdikti dep tanylǵan jeńil kólik júrgizýshisi Anel Sartaeva tergeý ýaqytynda úı qamaǵynda bolatyny týraly jazǵan edik.