Almatyda bir adamǵa shaqqanda 16 sharshy metr jasyl jelek bolady - Bas jospar
ALMATY. KAZINFORM – Almatyda qalanyń jańa Bas josparynyń strategııalyq ekologııalyq baǵalaýy boıynsha qoǵamdyq tyńdaýlar ótti.
Jıyn barysynda turǵyndar qalany kógaldandyrý baǵytynda atqarylatyn jumystarǵa baılanysty suraqtar qoıdy. Almatylyqtardy qalanyń jasyl qorynyń qazirgi jaı-kúıi qyzyqtyrdy.
Belgili qazaqstandyq bıotehnolog-ǵalym Gúlnur Júnisovanyń aıtýynsha, búgingi ahýalǵa jan-jaqty taldaý jasalǵan. Qazir Almatyda bir turǵynǵa shaqqanda jasyl jelekpen qamtamasyz etý deńgeıi shamamen 5 sharshy metr bolady. Bul belgilengen normatıvten edáýir tómen. Al mejeli kórsetkish – bir adamǵa shaqqanda 16 sharshy metr. Ásirese, Naýryzbaı jáne Alataý aýdandarynda jasyl jelektiń jetispeýshiligi baıqalady.
- Belgilengen mejege qol jetkizý úshin Bas josparda jasyl jelek kólemin edáýir ulǵaıtý kózdelgen. Osy maqsatta jyl saıyn 10 myńnan astam aǵash egý josparlanyp otyr. Bul rette jergilikti tabıǵı jaǵdaıǵa beıimdelgen ósimdik túrlerine basymdyq beriledi, – dedi ol.
Gúlnur Júnisova mundaı tásil qalanyń kógaldandyrý deńgeıin arttyryp qana qoımaı, qala ekojúıesiniń jaǵdaıyn jaqsartýǵa, bıologııalyq alýan túrlilikti saqtaýǵa jáne qaladaǵy qustar men janýarlardyń tirshilik etýine qolaıly orta qalyptastyrýǵa múmkindik beretinin atap ótti.
Eske salaıyq, buǵan deıin Almaty bas josparynyń qoǵamdyq tyńdaýlary bastalǵanyn jazǵanbyz.
