Almatyda bos jatqan jerdi ıemdengender tekseriledi
ALMATY. KAZINFORM – Almaty qalasynyń ákimi Darhan Satybaldy jumys sapary barysynda «Lamiya» turǵyn úı kesheni men jáne «Kóktem» shaǵynaýdanynyń turǵyndarymen kezdesti.
«Lamiya» turǵyn úı kesheni turǵyndarymen kezdesý kezinde elektr qýatymen úzdiksiz qamtý jáne ınjenerlik jelilerdi qalanyń ıeligine berý máselesi qozǵaldy. Júzdesý barysynda jaýapty basqarmalarǵa MIB ókilderi men qurylys kompanııasymen birlesip qosymsha transformatorlyq qosalqy stantsııa men rezervtik kabel salý máselesin pysyqtap, keıin ony qalanyń menshigine ótkizý tapsyryldy.
Sonymen qatar kommýnaldyq ınfraqurylym jáne turǵyn úı ınspektsııasy basqarmasyna burynǵy basqarýshy kompanııanyń qyzmetin quzyreti sheginde tekserý mindetteldi.
Al «Kóktem» shaǵynaýdanynyń turǵyndary bos jatqan jer qurylysqa berilip kete me dep alańdap otyr. Ákimniń tapsyrmasymen jerdi óz betimen ıemdený faktileri boıynsha qosymsha tekserý júrgiziledi.
- Barlyq sheshim bas josparǵa saı, ashyq túrde jáne turǵyndardyń pikirin eskere otyryp qabyldanýy qajet. Eger belgili bir aýmaq jasyl aımaqqa jatsa, onda ol jerde eshqandaı qurylys salynbaıdy, aǵash ta kesilmeıdi. Biz aǵashtardyń otalýyna jol bermeımiz. Aýmaqty damytý men tabıǵatty saqtaýdyń arasynan tepe-teńdik tabý – bizdiń basty maqsatymyz, – dedi qala ákimi.
Eske salaıyq, buǵan deıin Almatyda kólik ınfraqurylymy úshin 18 jer telimi memleket menshigine alynatynyn jazǵanbyz.