Almatyda bos oryndar jármeńkesi ótti
Almatyda «Azamattarǵa arnalǵan úkimet» memlekettik korporatsııasy» KEAQ ashyq alańynda, «Nurkent» shaǵyn aýdanynda bos oryndar jármeńkesi ótti. Іs-sharany «Amanat» partııasy jáne Almaty qalasynyń eńbek utqyrlyǵy ortalyǵy uıymdastyrdy. Bul týraly Almaty qalalyq ákimdigi málim etti.
Jármeńke halyqtyń ózekti máselelerin sheshýge baǵyttalǵan «Quqyqtyq kómek» jáne «Halyqqa kómek» jobalary aıasynda ótkizildi.
Bos oryndar jármeńkesin ótkizýdegi maqsat jalpy bilim beretin mektepterdiń, orta kásiptik bilim berý mekemeleriniń jáne jumyssyz jastarǵa eńbek naryǵynda suranysqa ıe mamandyqtar týraly aqparat berý, sonymen qatar, qolaıly mamandyqty tańdaýda tájirıbelik kómek kórsetý. Jumys berýshiler úshin bul is-shara qajetti kadrlardy irikteýdiń jáne ózderiniń bos jumys oryndary týraly kóp adamdy habardar etýge tamasha múmkindik.
Jármeńkege barlyǵy 20 jumys berýshi kompanııa, onyń ishinde óndiristik kásiporyndar, kúzet agenttikteri, qarjy uıymdary, sonymen birge, 120 izdenýshi qatysty. Usynylǵan stendterde jastar Enbek.kz ekojúıesi týraly aqparatpen tanysyp, jumys tabýmen qatar, jańa daǵdylar men mamandyqtardy úırenedi, jumyspen qamtý baǵdarlamalary týraly aqparat alady, sonymen qatar, «Bıznes bastaý» jobasy boıynsha oqı alady.
«Bos oryndar jármeńkesin ótkizý jumyssyz azamattar men jumys izdep júrgen azamattarǵa jumys berýshilermen tikeleı kezdesýge jáne baılanys jasaýǵa jáne jumysqa ornalasý máselesin jedel sheshýge múmkindik beredi», - dedi Eńbek utqyrlyǵy ortalyǵy dırektorynyń mindetin atqarýshy Aslanbek Qýanyshov.
ATÝ ýnıversıtetiniń stýdenti Dıastyń aıtýynsha, jármeńke karera týraly oılaıtyndar úshin jumys tabýǵa jaqsy múmkindik.
«Sondyqtan, men ótkiziletin is-sharalardan habardar bolý, qyzyqty jobalarǵa qatysý múmkindigin ótkizip almaý jáne ózime laıyqty jumys tabý úshin árqashan Eńbek utqyrlyǵy ortalyǵynyń áleýmettik jelilerin qadaǵalap otyramyn», - deıdi jármeńke qatysýshysy.
Aıta keterligi, Almaty qalasynyń Eńbek utqyrlyǵy ortalyǵy 2023 jyly kásiporyndarda, oqý oryndarynda, ákimdikterde, sonymen birge onlaın rejımde 30 bos oryndar jármeńkesin ótkizdi. Barlyǵy 27 761 jumys izdeýshi men 1467 jumys berýshi qatysty. Sondaı-aq 11376 bos jumys orny usynyldy. Barlyǵy 1398 adam jumysqa ornalastyryldy, kýrstardan, tájirıbeden jáne qoǵamdyq jumystardan ótýge jiberildi.
