Almatyda bógde adamnyń kóligin órtep jibergen kúdikti ustaldy
ALMATY. KAZINFORM – Almaty turǵynynyń kóligin órtep jibergen kúdikti ustaldy.
Almaty qalalyq Polıtsııa departamentiniń málimetinshe, kúdikti anonımdi tapsyrys berýshiniń aıtqanyn aqsha úshin oryndaǵanyn moıyndady.
«Bótenniń múlkin qasaqana joıý deregine qatysty qylmystyq is tergelip jatyr. Qazirgi ýaqytta qylmysqa qatysy bar basqa adamdardyń jáne tapsyrys berýshiniń kim ekeni, sonymen qatar onyń sebebin anyqtaýǵa baǵyttalǵan jedel-tergeý sharalary júrgizilip jatyr. Saraptama taǵaıyndaldy. Kúdikti ýaqytsha ustaý ızolıatoryna qamaldy», - dedi Áýezov aýdandyq Polıtsııa basqarmasynyń bastyǵy Ulan Ábilqaıyr.
Aıtýynsha, QR QK-niń 201-babyna sáıkes ózge aqparat tergeý múddesine oraı jarııa etilmeıdi.
«QR Konstıtýtsııasynyń 77-baby 3-bólimi, 1-tarmaǵy, QR QK-niń 19-baby 1-tarmaǵyna saı kez kelgen azamat sot sheshimi zańdy kúshine engenge deıin kinásiz dep sanalady», - dep atap ótti ol.
