Almatyda «bochcha» paralımpıadalyq sport túrinen ınklıýzıvti týrnır ótti
ALMATY. KAZINFORM – Qazaqstan bochcha Federatsııasy «SADU ARENA» sport kesheninde «bochcha» paralımpıadalyq sport túrinen ınklıýzıvti týrnır ótkizdi. Іs-shara ınklıýzıvti qoǵamdy damytýǵa jáne erekshe qajettiligi bar jas sportshylar arasynda belsendi ómir saltyn nasıhattaýǵa baǵyttaldy. Bul týraly «Qazaqstan bochcha federatsııasynyń» baspasóz qyzmeti habarlady.
Týrnırge 40 qatysýshy, onyń ishinde múgedektigi bar balalar men eresekter, sondaı-aq úkimettik emes jáne kommertsııalyq uıymdardyń ókilderi, stýdentter qatysty. Sharanyń basty maqsaty – bul oıyn túrin tanymal etý ǵana emes, sondaı-aq qoǵamdaǵy ınklıýzıvtilik pen teńdikti nyǵaıtý, dıalog pen ózara árekettesý alańyn qurý.
Ashylý saltanatynda Almaty qalasy máslıhatynyń hatshysy, «Bochcha» paralımpıadalyq sport federatsııasynyń basshysy Meıirjan Batyrbekuly Otynshıev, Almaty qalasy Jumyspen qamtý jáne áleýmettik baǵdarlamalar basqarmasynyń basshysy Baýyrjan Janatuly Jaýbasov, sondaı-aq Almaty qalasy bilim basqarmasynyń basshysy Zoıa Qashqynbaıqyzy Qoıshybaeva sóz sóıledi.
Olar óz sózderinde «Bochcha» sport túriniń mańyzdylyǵyn, ınklıýzııany damytýdaǵy rólin jáne sportshylardyń jetistikterin atap ótti. Іs-sharaǵa qatysqan qola júldeger Gýsman Qyrǵyzbaev pen Parıjdegi Olımpıada oıyndarynyń kúmis júldegeri Nurbek Oralbaı da óz tájirıbelerimen bólisip, jastardy sportpen aınalysýǵa shaqyrdy.
Qazaqstan Bochcha federatsııasynyń demeýshisi «ERG Komek» korporatıvtik qorynyń qoldaýymen Almaty qalasyndaǵy erekshe qajettiligi bar sportshylarǵa arnalǵan sport klýbyna bochcha doptarynyń eki jıyntyǵy jáne bochcha oınaýǵa arnalǵan arnaıy rampa berildi.
Bochcha – doppen oınaıtyn sporttyq oıyn. Oǵan tirek-qımyl apparaty buzylǵan adamdar qatysady. Atalǵan saıys túri 1984 jyly Paralımpıadalyq oıyndar baǵdarlamasyna engizilgen. Qazaqstanda alǵash ret 2018 jyly negizi qalanyp, qarqyndy damyp keledi. Qazirgi tańda bul sport múgedektigi bar azamattardyń, ásirese, balalar men jastardyń arasynda úlken qyzyǵýshylyqqa ıe.
