Almatyda bloger Ádilet Moldahanǵa qatysty sot bastaldy: ol kinásin moıyndady
ALMATY. KAZINFORM — Almaly aýdandyq sotynda bloger ári zańger Ádilethan Moldahanǵa qatysty sot otyrysy bastaldy.
Oǵan QR Qylmystyq Kodeksi 274-baby 2-tarmaǵy 3-bóligi boıynsha (kórineý jalǵan aqparat taratý) aıyp taǵyldy. Іs boıynsha jábirlenýshi retinde Almaty qalasy polıtsııa departamenti basshysynyń burynǵy orynbasary Erjan Uzabaev jáne Almaty qalasy polıtsııa departamenti Ákimshilik polıtsııa basqarmasynyń burynǵy basshysy Serik Shýmaev tanyldy.
Sot otyrysynda tóraǵalyq etýshi sýdıa — Ernar Qasymbekov, al prokýror — Uljan Ábdiramanova boldy. Otyrys bastalǵanan keıin aıyptalýshy Ádilethan Moldahan óz kinásin tolyq moıyndap, isti qysqartylǵan tártipte ótkizýge ótinish jasady. Jábirlenýshi tarap bul ótinishhatqa qarsylyq bildirmedi.
Sondaı-aq aıyptalýshy qamaýda ustaý týraly bultartpaý sharasyn úıqamaqqa aýystyrýǵa ótinish bildirdi. Prokýror bul ótinishke qarsylyq bildirse, jábirlenýshi tarap sottyń qaraýyna qaldyrdy. Sýdıa keńesý bólmesinen kelgen soń, aıyptalýshyny úıqamaqqa jiberýden bas tartty.
Al jábirlenýshi Uzabaevtyń advokaty Asylbek Ábdiraıymov moraldyq shyǵyn retinde 10 mln teńge jáne sot shyǵyndaryna 1 mln teńge azamattyq talap-aryz qoıdy.
Sýdıa sottyń tergeý bólimi kelesi otyrysta bastalatynyn aıtyp, úzilis jarııalady. Іstiń qysqartylǵan tártipte ótkizilýi de kelesi sot otyrysynda qaralady.
Eske salaıyq, Almatyda 1 mıllıonnan astam oqyrmany bar bloger Ádilethan Moldahan ustalǵanyn jazǵanbyz.
Polıtsııa oǵan qatysty kórineý jalǵan aqparat taratý deregi boıynsha is qozǵady. Bloger áleýmettik jelide quqyqtyq saladaǵy beınejazbalarymen tanymal. Ásirese, onyń Ál-Farabı dańǵylynda bolǵan jol apaty jaıly jarııalaǵan beınejazbalary jelide keńinen tarady.
Buǵan deıin sot qaýlysymen oǵan 10 táýlik merzimge qamaýda ustaý túrindegi bultartpaý sharasy qoldanylǵan bolatyn.
Keıin Ádilethan Moldahandy qamaýda ustaý merzimi 2 aıǵa uzartyldy.
