Almatyda bıznes-ortalyq órtenip jatyr

ALMATY. KAZINFORM – Almaly aýdanynda úsh qabatty ákimshilik ǵımarattyń shatyry órtendi.

Otqa oranǵan ǵımarattyń vıdeosy áleýmettik jelide tarady. Qalalyq Tótenshe jaǵdaılar departamentiniń baspasóz qyzmeti málim etkendeı órt sóndirýshiler Almaly aýdany, Áýezov kóshesi, 33/35 mekenjaıyndaǵy ǵımaratan shyqqan órtti sóndirip jatyr.

– Úsh qabatty ákimshilik ǵımarattyń shatyry órtenip jatyr, aýmaq naqtylanyp jatyr, – dep habarlady Tótenshe jaǵdaılar departamentiniń baspasóz qyzmeti.

Vedomstvodan atap ótkendeı, gaz jáne tútinnen qorǵaý qyzmetiniń bólimsheleri adamdardyń bar-joǵyna barlaý jumystaryn júrgizip jatyr.

Órttiń jaqyn mańdaǵy ǵımaratqa taralý qaýpi joıyldy.

Osyǵan deıin Almaty Arena muz saraıynda órt shyǵyp, 4 bala qutqarylǵany týraly jazǵan edik.