Almatyda bıznes nysandaryn jelilerge qosý kezinde zańbuzýshylyqtar anyqtaldy
ASTANA. KAZINFORM — Almaty prokýratýrasy kásipkerlik nysandaryn ınjenerlik jelilerge qosý kezinde tabıǵı monopolııalar sýbektileri tarapynan zańbuzýshylyqtar bolǵanyn anyqtady.
Prokýratýranyń málimetinshe, keıbir tabıǵı monopolııalar sýbektileri «Memlekettik qala qurylysy kadastry» avtomattandyrylǵan aqparattyq júıesine qajetti málimetterdi ýaqytynda engizbegen ári olardy tıisti deńgeıde jańartpaǵan.
Sonyń saldarynan kásipkerler men ınvestorlar nysandaryn ınjenerlik ınfraqurylymǵa qosý úshin bos qýattyń bar-joǵy jáne tehnıkalyq múmkindik týraly naqty aqparatty ýaqytynda ala almaǵan.
Prokýratýra mundaı jaǵdaı rettelip kórsetiletin qyzmetterdiń ashyqtyǵy men qoljetimdiligi talaptaryna qaıshy ekenin málimdedi.
Tekserý nátıjesinde kináli tulǵalar Ákimshilik quqyq buzýshylyq týraly kodekstiń 164-babynyń 1-bóligi boıynsha jaýapqa tartyldy. Olarǵa salynǵan aıyppuldyń jalpy somasy 4,7 mln teńge boldy.
Qazir ınjenerlik qýattardyń bolýy men qoljetimdiligi týraly qajetti málimetter aqparattyq júıege engizildi.
Eske salaıyq, buǵan deıin Qaraǵandyda ınvestorlarǵa negizsiz qarjylyq sanktsııalar qoldanylǵanyn jazǵanbyz.
