Almatyda byltyr qaıtyrylǵan aktıvterdi satýdan 3 mlrd teńge tabys túsken

ALMATY. KAZINFORM – Memleket menshigine qaıtarylǵan Almatydaǵy birneshe aktıv aýktsıonda satyldy.

Byltyr Qaıtarylǵan aktıvterdi basqarý kompanııasynyń basqarýynda bolǵan Almatydaǵy eki nysan 3,1 mlrd teńgege satylǵan. 

Onyń bireýi – Jetisý aýdany, Ratýshnyı kóshesi, 64 «G» mekenjaıynda ornalasqan ákimshilik ǵımarat. Nysan 1,6 mlrd teńgege satyldy. Ekinshisi – Bostandyq aýdany, Baıtursynov kóshesi, 104 mekenjaıynda ornalasqan turǵyn emes úı-jaı. Ol aýktsıonda 1,5 mlrd teńgege baǵalandy. 

– Barlyq satý protsesi elektrondyq saýda arqyly ashyqtyq, básekelestik jáne qatysýshylar úshin teń qoljetimdilik qaǵıdattaryn saqtaı otyryp júrgizildi, - dep habarlady kompanııadan.

Eske salaıyq, 2025 jyly Qaıtarylǵan aktıvterdi basqarý kompanııasy Almatydan «Baısat» bazaryn birneshe ret satýǵa tyrysty. Alaıda satyp alýshy tabylmaǵandyqtan, aýktsıon eki márte ótpedi. Osy oraıda, agenttik 26 mlrd teńgege baǵalanǵan bazardyń bolashaǵy qandaı bolatynyn anyqtap kórdi.