Almatyda byltyr bıýdjetten 47 mlrd teńge ıgerilmegen – ákim orynbasary jaýap berdi
ALMATY. KAZINFORM – Almatyda qalalyq máslıhattyń kezekti XXX sessııasy ótti. Onda 2024 jylǵy Almaty qalasynyń bıýdjetin atqarý máseleleri talqylandy.
Almaty qalasy Qarjy basqarmasynyń basshysy Qanat Sýhambekov megapolıstiń kirisi týraly baıandady. Onyń aıtýynsha, Almatyda byltyr memlekettik bıýdjetke 5,6 trln teńge túsken, onyń ishinde 5,5 trln teńge – salyq túsimderi. Respýblıkalyq bıýdjetke 3 trln 731,9 mlrd teńge, jergilikti bıýdjetke 1 trln 874 mlrd teńge túsken.
Almaty qalasynyń ár aýdany boıynsha bıýdjettik túsimder: Bostandyq aýdany – 29,8%, Medeý aýdany – 23,8%, Almaly aýdany – 19,9%, Áýezov aýdany – 7,9%, Jetisý aýdany – 7,2%, Túrksib aýdany – 5,8%, Alataý aýdany – 3,7%, Naýryzbaı 1,9% boldy.
- Byltyr Almaty qalasynyń damý bıýdjetine 263 mlrd teńge bólinip, onyń 250 mlrd teńgesi ıgerildi. Bilim berý salasyna 99 mlrd teńge, sýmen qamtamasyz etýge 39,4 mlrd teńge, jol ınfraqurylymyna 29,4 mlrd teńge, turǵyn úı salasyna 6,5 mlrd teńge, densaýlyq saqtaý salasyna 3,6 mlrd teńge jáne ózge salalarǵa 71,6 mlrd teńge baǵyttaldy, – dedi Qanat Sýhambekov.
Qarjy basqarmasynyń basshysy ótken jyldyń qorytyndysy boıynsha ıgerilmegen bıýdjet 47,1 mlrd teńge ekenin atap ótti. Onyń ishinde jergilikti bıýdjetke 43 mlrd teńge qaıtarylǵan. Atap aıtqanda:
- Qurylys basqarmasy 27,9 mlrd teńge;
- Qalalyq mobıldilik basqarmasy 5,3 mlrd teńge;
- Jumyspen qamtý jáne áleýmettik baǵdarlamalar basqarmasy 3,4 mlrd teńge;
- Energetıka jáne sýmen jabdyqtaý basqarmasy 3,3 mlrd teńge;
- Qoǵamdyq keńistikterdi damytý basqarmasy 2 mlrd teńge qarajatty ıgermegen.
Sessııa barysyndy Almaty máslıhatynyń depýtaty Ramazan Bekbol ıgerilmegen bıýdjet boıynga qala ákiminiń orynbasary Beıbit Shahanovqa suraq qoıdy.
- Qurylys basqarmasy turǵyn úıdi satyp alý baǵyty boıynsha 24,5 mlrd teńge jumsaýy qajet edi. Nelikten bul qarajat qaıtaryldy? Nelikten oryndalmaı jatyr? – dedi depýtat.
Beıbit Shahanov tapsyrysqa salynyp jatqan úıler talapqa saı bolmaǵandyqtan, oǵan qarastyrylǵan qarajat bıýdjetke qaıtarylǵanyn aıtty.
- Almatyda turǵyn úı kútip, kezekte turǵan azamattardyń sany 45 myńǵa jetti. Sony sheshý úshin turǵyn úıdi satyp alý qarajatyn buryn-sońdy bolmaǵan kólemge jetkizdik. Ótken jyly 3 myń páter satyp aldyq. Onyń tapsyrysy bıyl bolatyn, biraq qurylysshylarǵa byltyr jyl sońyna deıin ótkizýge talap qoıdyq. Qurylysshylar bizge páterlerin usyndy. Biraq biz ony tolyq qabyldamadyq. Óıtkeni bizdiń talaptarymyzǵa sáıkes bolmady. Jartylaı qabyldadyq, qalǵanyn 24 mlrd-tyń páterleri talapqa sáıkes bolamaǵandyqtan ony osy jylǵa qaldyrdyq. Bıyl josparly túrde qalaǵa beriledi, Otbasy bank arqyly taratylady. Negizgi maqsat – kezekte turǵan adamdarǵa sapaly páter berý. Úılerdi qabyldap alyp, aqshany ıgere salmaı, sapaly páter qabyldaý úshin sondaı sheshim qabyldandy, – dedi Beıbit Shahanov.
Eske salaıyq, buǵan deıin Almatyda qaraýsyz qalǵan ǵımarattar qashan jóndeletinin jazǵanbyz.