Almatyda bıyl jol apatynan 11 moped júrgizýshisi qaıtys boldy

ALMATY. KAZINFORM - Almatyda moped júrgizýshileriniń apatqa ushyraý jaǵdaılary azamaı tur. Bul týraly qalalyq polıtsııa departamenti habarlady.

Almaty qalasy Polıtsııa departamenti Jol polıtsııasy patrýldik polıtsııa polkiniń komandıri Oralbek Ahımovtyń aıtýynsha, jyl basynan beri megapolıste moped júrgizýshileri 523 ret jol-kólik oqıǵasyna ushyraǵan.

Nátıjesinde 535 adam jaraqat alyp, 11 adam kóz jumdy. Jol qozǵalysy erejelerin buzǵany úshin 19 myńnan astam moped paıdalanýshysy ákimshilik jaýapkershilikke tartyldy. Mamandandyrylǵan aıyppul turaǵyna 1,5 myńnan astam moped qoıyldy.

– Qurmetti júrgizýshiler, kólik júrgizý kezinde jol qozǵalysy erejeleriniń barlyq talaptaryn oryndap, abaı bolý kerek. Bul jol-kólik oqıǵalarynan, jaraqat alýdan jáne ártúrli qaıǵyly saldardan aýlaq bolýǵa múmkindik beredi, – dep eskertti Oralbek Ahımov.

Eske salaıyq, buǵan deıin Almatydaǵy aıypturaqta myńnan asa moped turǵanyn jazǵanbyz.

Birneshe kún buryn Almatyda gazelge soqtyǵysqan moped júrgizýshisi qaıtys boldy.