Almatyda bıyl jastarǵa arnalǵan taǵy 5 ortalyq ashylady

ALMATY. KAZINFORM – Almatyda 2026 jyly 5 jańa komıýnıtı ortalyq ashylady.

Qalalyq jastar saıasaty basqarmasynyń málimetinshe, osy jyldyń ishinde Alataý, Almaly, Áýezov, Bostandyq jáne Túrksib aýdandarynda 5 jańa komıýnıtı ortalyǵyn iske qosý kózdelgen. Jańa alańdar ashylǵannan keıin qala boıynsha olardyń jalpy sany 16-ǵa jetedi.

- Infraqurylymdy damytý jastarǵa kórsetiletin qyzmettiń qoljetimdiligin arttyryp, olardy qalanyń áleýmettik, mádenı jáne bilim berý bastamalaryna belsendi túrde tartýǵa baǵyttalǵan, — dep habarlady vedomstvo.

Odan bólek qalada alǵash ret keminde 8 jastardyń úkimettik emes uıymyn qurý jáne damytý josparlanyp otyr. Olar ekologııalyq, patrıottyq, eriktilik jáne basqa da baǵyttarda jumys istep, komıýnıtı ortalyqtardyń qoldaýymen jobalyq komandalar retinde qyzmet atqarady.

- Bul uıymdar jastardy qala deńgeıindegi máselelerdi birlesip sheshýge múmkindik beredi, - dep túsindirdi basqarmadan.

Eske salaıyq, el jastary búginge deıin turǵyn úı men bilimge 35,2 mln dollar jumsaǵan.