Almatyda bıyl jarty tonnadan astam esirtki tárkilendi

ALMATY. KAZINFORM – Almatyda 9 aıda jarty tonnadan astam esirtki tárkilenip, úsh qylmystyq toptyń qyzmeti toqtatyldy.

Almaty qalasy polıtsııa departamenti bastyǵynyń birinshi orynbasary Qýatbek Naýatovtyń aıtýynsha, 2025 jyldyń 9 aıynda esirtkige qatysty 500-den astam qylmys ashyldy. Zańsyz aınalymnan 525 keliden astam esirtki zaty, onyń ishinde 52 keli sıntetıkalyq jáne 3 tonnadan astam BK-4 prekýrsory tárkilendi. Sondaı-aq qylmystyq jolmen alynǵan 255 mıllıon teńge men múlik memleket kirisine berildi.

- Sonymen qatar 2 esirtki zerthanasynyń qyzmeti toqtatylyp, esirtkini ótkizý jáne taratýǵa qatysy bar 3 qylmystyq toptyń áreketi áshkerelendi. Bizdiń negizgi maqsatymyz – azamattardyń, ásirese jas urpaqtyń densaýlyǵy men qaýipsizdigin saqtaý, qoǵamdy esirtki qaýipinen qorǵaý, – dedi Qýatbek Naýatov.

Odan bólek bıyl zańsyz esirtki aınalymyna qatysy bar 1,5 myń otandyq jáne 5 myńnan astam sheteldik bank kartasy, sondaı-aq 312 krıptoámııan buǵattaldy. Sondaı-aq esirtki taratýǵa paıdalanylǵan 2 myń 200 ınternet-resýrs buǵattaldy, olardyń 27-si - Telegram arna.

Eske salaıyq, Almaty oblysynda bıyl 6 tonna esirtki tárkilendi.