Almatyda bıyl jańa stadıon qurylysyna baılanysty alǵashqy jumystar bastalady
ALMATY. KAZINFORM – Almatyda jańa fýtbol stadıony salynady.
Almaty ákiminiń orynbasary Azamat Qaldybekov bıyl stadıon qurylysyna baılanysty alǵashqy jumystar bastalatynyn aıtty.
– Qulja jáne Talǵar avtojoldary aralyǵynda jańa stadıon salynady. Ol úshin 14,9 gektar jer telimi belgilendi. Qazirgi ýaqytta ınjenerlik jelilerdi júrgizýge tehnıkalyq-ekonomıkalyq negizdeme alyndy. Qarjy bólindi, qazir negizinen jerge baılanysty jumystar júrgiziledi, - dedi ol.
Sondaı-aq Almaty ákiminiń orynbasary Ortalyq stadıondy jańǵyrtý týraly pikir bildirdi.
– Ortalyq stadıon zamanaýı modernızatsııany talap etedi. Osy jyldyń sońyna deıin stadıon tehnıkalyq tekserýden ótedi. Biraq jańa stadıon salynady, al qazirgi alańdy kútip ustaýdy jalǵastyramyz. Jańa stadıon qurylysy aıaqtalǵan soń, Ortalyq stadıon jeńil atletıka alańy retinde qoldanylady. Sondyqtan osyndaı modernızatsııa júrgizemiz, - dedi ol.
Eske salaıyq, buǵan deıin Almatyda 35 myń kórermenge eseptelgen, UEFA-nyń 4-sanat talaptaryna saı keletin jańa stadıon salynatynyn jazǵanbyz.