Almatyda bıyl jańa 34 týrıstik nysan paıdalanýǵa berildi
ALMATY. KAZINFORM – Almatyda 2025 jyldyń birinshi jartyjyldyǵynda týrısterdi ornalastyrý (qonaqúı, hostel) salasynda kórsetilgen qyzmetter kólemi 50,1 mlrd teńge boldy. Bul ótken jyldyń osy kezeńimen salystyrǵanda 16,6% artyq.
Almaty qalasy týrızm basqarmasynyń málimetinshe, mundaı ósim týrızm salasynyń damyp kele jatqanyn jáne Almatyǵa ishki ári halyqaralyq týrıster tarapynan qyzyǵýshylyqtyń arta túskenin kórsetedi. Qazir qala qonaqúılerindegi bólmeler sany ótken jylmen salystyrǵanda 8% artyp, 12 552-ge jetken.
- Qaladaǵy ornalastyrý oryndarynyń bir mezettegi syıymdylyǵy 22 768 tósek-oryn, bul qonaqtardy kóbirek qabyldaýǵa jol ashady. Іshki jáne sheteldik týrıster tarapynan qyzyǵýshylyq artqanyn baıqap otyrmyz. Jańa jobalar jumys oryndaryn ashyp, ınfraqurylymdy jaqsartyp, Almatyda demalysty qoljetimdi ári jaıly etedi, – dep habarlady týrızm basqarmasy.
Bıyl jyl basynan beri jeke ınvestıtsııalar esebinen 34 jańa týrıstik nysan paıdalanýǵa berilgen. Olardyń ishinde 11 qonaq úı, 1 glempıng, 1 kapsýlalyq qonaq úı, 18 hostel jáne 3 demalys bazasy bar.
Eske salaıyq, buǵan deıin Almatyǵa jarty jylda 1,1 mıllıonnan astam týrıst kelgenin jazǵanbyz.
