Almatyda bıyl samokat júrgizýshilerine qatysty jańa talaptar kúshine enedi
ALMATY. KAZINFORM – Almaty kóshelerinde 2025 jyldyń 1 jeltoqsanynan bastap elektrli samokattar alynyp tastaldy. Alaıda bıyl 1 naýryzdan keıin bul kólik túri qaıtadan megapolıs joldaryna oralady.
Kazinform tilshisi jańa maýsymda samokat júrgizýshilerine qandaı jańa talaptar qoıylatynyn anyqtady. Almaty qalasynyń Jol qozǵalysy jáne jolaýshylar kóligin uıymdastyrý basqarmasy jaýabyna sáıkes, qys kezinde operatorlar samokattarǵa tehnıkalyq qyzmet kórsetip, qurylǵylardyń jaramdylyǵyn, akkýmýlıatorlaryn tekseredi jáne monıtorıng júıelerin jańartady. Ol maýsym bastalǵanda tehnıkanyń qaýipsiz bolýyn qamtamasyz etýge baǵyttalǵan.
Al 2026 jyly qala ákimdigi jalǵa samokat usynatyn kompanııalarǵa jańa talaptar qoıdy:
* Jalǵa beriletin elektr samokattardyń saqtandyrýy jáne sáıkestendirýge bolatyn nómiri bar tirkeýi bolýy tıis.
* Kompanııalar tehnıkany esepke alýǵa, tirkeý nómirlerin berýdi qamtamasyz etýge, sondaı-aq samokat júrgizýshileriniń 18 jasqa tolǵanyn jáne kez kelgen sanattaǵy jaramdy júrgizýshi kýáliginiń bolýyn tekserýge mindetti.
* Sonymen qatar ákimdiktiń quqyq qorǵaý organdarymen birlesip samokatty paıdalaný mádenıetin arttyrýǵa baǵyttalǵan jumysy jalǵasady.
– Operatorlar tehnıkany ýaqtyly kútip-ustaýǵa, onyń tehnıkalyq jaı-kúıin baqylaýǵa jáne aqaýy bar qurylǵylardy paıdalanýdan alyp tastaýǵa, sondaı-aq jalǵa alýshylardy qaýipsiz paıdalaný erejeleri men jol qozǵalysy erejelerin buzýdyń saldary týraly habardar etýge mindetti. Monıtorıng, jyldamdyqty shekteý sııaqty tehnologııalyq sheshimder de qaýipsizdikti arttyrý jónindegi sharalardyń bir bóligi retinde qarastyrylady. Birqatar normatıvtik qujattar men usynystarda operatorlardyń tehnıkany retsiz qoıýdy shekteý jáne jaıaý júrginshilerge nemese qozǵalystyń basqa qatysýshylaryna kedergi keltiretin oryndarǵa ornalastyrmaý mindeti de talqylanyp jatyr, - dep habarlady basqarma.
Al kýrerler jıi paıdalanatyn elektr velosıpedter eger qýaty 250 Vt-qa deıin jáne jyldamdyǵy 25 km/saǵ-qa deıin bolsa, áli de qarapaıym velosıpedterge teńestiriledi. Qazirgi ýaqytta olarǵa trotýarlar men jaıaý júrginshiler jolymen júrýge shekteý qoldanylmaıdy.
Eske salaıyq, 2025 jyly samokattan qansha adam japa shekkenin jazǵanbyz.