Almatyda bıyl nárestelerge qoıylǵan eń tanymal esimder qandaı

ALMATY. KAZINFORM – «Azamattarǵa arnalǵan úkimet» memlekettik korporatsııasynyń Almaty qalalyq fılıaly jańa týǵan sábılerge qoıylǵan eń tanymal esimderdiń reıtıngin jarııalady.

Almaty qalalyq AHAT basqarmasynyń málimetine sáıkes, jyl basynan beri megapolıste 8900 týý týraly akt tirkelgen. Onyń ishinde 4653-i ul bala, 4247-si qyz bala.

Qyz balalar arasynda eń tanymal úsh esim — Aılın, Asylym, Tomırıs. Al ul balalar arasynda Mýhammed, Alan jáne Alıhan esimderi kósh bastap tur.

Sonymen qatar jıi qoıylatyn esimder qatarynda Alı, Álem, Ramazan, Amır, Aısultan, Hamza, Medına, Safııa, Aıym, Adııa jáne Aıala bar.

- Búginde ata-analar esim tańdaýda ulttyq dástúr men zamanaýı úrdisterdi ushtastyrýǵa mán beredi. Maǵynasy tereń, aıtýǵa jeńil ári áýezdi esimderge suranys artyp keledi. Bul ulttyq bolmys pen zamanaýı trendterdiń úılesimin kórsetedi, - dep habarlady fılıaldan.

Eske salaıyq, náresteni tirkeýge birneshe tásilmen ótinish berýge bolady: halyqqa qyzmet kórsetý ortalyqtary, elektrondyq úkimet portaly jáne ekinshi deńgeıli bankterdiń mobıldi qosymshalary arqyly.

Sonymen qatar qyzmet proaktıvti formatta da qoljetimdi. Bala týǵannan keıin bir táýlik ishinde anasynyń telefonyna 1414 nómirinen quttyqtaý SMS habarlama kelip, qajetti qujattardy rásimdeý boıynsha qadamdyq nusqaýlyq usynylady.

Byltyr Almatyda balalarǵa qoıylatyn eń tanymal esimder týraly jazǵanbyz. Tizimde birshama ózgeris bar. Tolyǵyraq siltemeden oqı alasyzdar.