Almatyda bıyl mopedterdiń qatysýymen 300-ge jýyq jol apaty boldy
Almatyda jyl saıyn samokat pen mopedterdiń qatysýymen bolatyn jol apatynyń sany ósip keledi, dep habarlaıdy QazAqparat tilshisi.
Almaty qalalyq polıtsııa departamentiniń málimetinshe, megapolıste 50 myńnan astam moped pen samokat bar, osyǵan baılanysty jol apatynyń sany da ósken. Jyl basynan beri samokattardyń qatysýymen 25 jol apaty bolǵan, saldarynan 2 adam qaza taýyp, 27 adam jaraqat aldy.
Іshki ister mınıstrligi qabyldaǵan sharalar samokattarǵa qatysty jaǵdaıdy birshama turaqtandyrýǵa múmkindik berdi. Bul týraly Almaty qalalyq polıtsııa departamentiniń bastyǵy Arystanǵanı Zapparov aıtty. Onyń sózinshe, jas shekteýleri belgilendi, qorǵanys quraldaryn mindetti túrde paıdalaný jáne jolaýshylardy tasymaldaýǵa talaptar qoıyldy.
"Alaıda qaıǵyly oqıǵalar jalǵasyp jatyr. Kúni keshe ǵana samokat júrgizýge týysy ruqsat bergen 13 jasar bala qaıtys boldy. Jas jigit qalaǵa basqa jaqtan kelgen jáne úlken qaladaǵy kólik qozǵalysyna beıimdelmegen. Saldarynan jasóspirim júk kóliginiń astyna túsip, kóz jumdy", – dedi Almaty qalalyq polıtsııa departamentiniń bastyǵy.
Ol sondaı-aq mopedterge qatysty synı jaǵdaıǵa nazar aýdardy. Sebebi, jyl basynan beri mopedterdiń qatysýymen 292 jol apaty bolyp, nátıjesinde 14 adam qaza tapty, byltyr eki adam qaza bolǵan.
"Joǵaryda atalǵan statıstıka alańdaýshylyqty týdyrady. Samokat pen mopedti júrgizýshiler jol qozǵalysyna qatysýshy álsiz sanattardyń biri. Sebebi, avtokólikte qaýipsizdik beldigi nemese qaýipsizdik jastyǵy bar bolsa, eki dóńgelekti kólikterde ondaı eshteńe joq. Sondyqtan olardyń qatysýymen bolatyn árbir apat qaıǵyly jaǵdaıda aıaqtalady. Osy oraıda men barlyq jol qozǵalysyna qatysýshylardy jol erejelerin qatań saqtaýǵa shaqyramyn. Ata-ana óz balasynyń qaýipsizdigi úshin tolyq jaýapkershilikti sezinýi qajet. Qylmysqa nemquraılylyq tanytpańyz, balańyzdy qorǵańyz, óz úlgińizben zańǵa qurmetpen qaraýdy úıretińiz", – dedi Arystanǵanı Zapparov.
Eske salsaq, Almatyda jaqynda samokat júrgizip kele jatqan jasóspirimdi júk kóligi basyp ketken bolatyn.
Sondaı-aq Almatyda KamAZ moped aıdaǵan 17 jastaǵy bozbalany qaǵyp ketip, mert qylǵanyn jazǵanbyz.
