Almatyda bıyl memleket muqtajyna 800 ýchaske alyndy: maqsat qandaı
ALMATY. KAZINFORM — Almatyda memleket muqtajy úshin májbúrli túrde jer telimderin alý jumystary júrgizilip keledi.
Qarqyndy ýrbanızatsııa júrip jatqan qazirgi ýaqytta Almaty syndy iri megapolısterdiń ınfraqurylymy toqtaýsyz damyp otyrýy qajet. Alaıda barlyq nysandary tyǵyz ornalasqan shaharda mektep qurylysy úshin ne kósheni uzartý úshin bos jer telimin tabý múmkin bola bermeıdi. Sondyqtan QR Jer kodeksiniń 84-babyna jáne QR «Memlekettik múlik týraly» Zańynda kórsetilgen normalarǵa sáıkes jekemenshiktegi jer telimderi memleket muqtajyna alynady. Ol úshin Almaty ákimi tıisti qaýly shyǵarady. Onyń negizinde jer qatynastary basqarmasy ýchaske ıesimen kelisim jasap, naryqtyq baǵamen tólem jasaıdy. Al memleket menshigine alynǵan jer telimderi qurylys júrgizý úshin tıisti vedomstvonyń qaramaǵyna beriledi.
Kazinform agenttiginiń saýalyna jaýap bergen Almaty qalasynyń jer qatynastary basqarmasy 2025 jyldyń basynan beri memleket muqtajy úshin 799 jer ýchaskesi men jyljymaıtyn múlik nysandary satyp alynǵanyn habarlady.
— Basqarmamen memlekettik muqtaj úshin jer ýchaskelerin alyp qoıý boıynsha tıisti jumystar atqarylyp jatyr. Atalǵan jumys qala damýynyń negizgi bastamalaryn iske asyrý aıasynda júıeli jáne josparly túrde júrgizilýde. Bıyl 541 ýchaske kólik ınfraqurylymy nysandaryn salý, 258 ýchaske áleýmettik nysandardyń qurylysy úshin satyp alyndy, — delingen resmı jaýapta.
Tólem baǵasy qalaı belgilenedi
Májbúrli túrde alynatyn aýmaqta táýelsiz mamandar baǵalap, naryq boıynsha qunyn kórsetedi. Ol boıynsha qala tólem usynady. Jerdiń menshik ıesi ýchaskesin satýdan bas tartqan jaǵdaıda ne tólem baǵasymen kelispese, vedomstvo sotqa júginedi. Sot jer telimi men onda ornalasqan nysandardyń ádil baǵasyna qaraı tólem kólemin belgileıdi. Ári qaraı sot úkimimen májbúrli túrde jer telimi alynady.
Jer qatynastary basqarmasynyń málimetinshe, bıyl menshik ıeleriniń tólem baǵasyna kelispeýine baılanysty ákimdik 393 nysan boıynsha sotqa júgingen.
— Olardyń 109-y aıaqtaldy, — dep málimdedi vedomstvo.
Memleketke alynǵan jerdiń maqsaty ózgerýi múmkin be
Almatynyń Túrksib aýdanynda № 20 orta mektepti keńeıtý josparlanyp otyr. Ol úshin mektep janyndaǵy birneshe jeke úı memleket muqtajyna alynady. Menshik ıelerine tıisti habarlandyrý kelgennen keıin turǵyndar bul sheshimge narazylyq bildirdi. Olardyń qatarynda ýchaske turǵyn úı keshenin salýǵa beriledi degen alańdaýshylyq boldy.
— Memleket qajetine alynǵan jerler tek maqsatyna saı paıdalanylady jáne úshinshi tulǵalarǵa nemese kommertsııalyq maqsatta berilýi múmkin emes. Bul jaǵdaıda tek oqý nysanyn salý týraly sóz bolyp otyr, — dep málimdedi ákimdikten.
Eske salaıyq, Almatyda iri jobalardyń júzege asýy jer ýchaskelerin alý jumysynyń tym sozylyp ketýinen keshigip jatady. Mysaly, Seıfýllın dańǵyly men Jansúgirov kóshesiniń qıylysynda ornalasqan kólik jolaıryǵynyń qurylysy 2017 jyly bastaldy. Biraq turǵyndardan jer ýchaskelerin májbúrli túrde satyp alý jumystaryna baılanysty joba qurylysy sozylyp, tek 2025 jyly aıaqtaldy.
Buǵan deıin Almatynyń eks-ákimi Erbolat Dosaev Saın dańǵylyn uzartý jumystary 1 jer teliminiń satyp alynbaýynan toqtap qalǵanyn aıtqan edi.