Almatyda bıyl magnıt jutyp qoıǵan 15 bala aýrýhanaǵa tústi
ALMATY. KAZINFORM — Almatyda balalardyń magnıt jutyp qoıý jaǵdaılary jıi tirkelip jatyr.
Jyl basynan beri osyndaı jaǵdaımen Balalar shuǵyl medıtsınalyq kómek kórsetý ortalyǵyna 15 bala jetkizilgen. Bir ǵana kezekshilik kezinde úsh balaǵa shuǵyl ota jasaýǵa týra kelgen. Bul týraly qalalyq Qoǵamdyq densaýlyq saqtaý basqarmasynyń ókilderi habarlady.
Vedomstvo málimetinshe, alǵashqy naýqas — 2 jastaǵy bala naýqas. Ol aýrýhanaǵa ishiniń aýyrsynýyna baılanysty jetkizilgen. Tekserý barysynda dárigerler onyń aǵzasynan bógde zattardy anyqtady. Shuǵyl jasalǵan ota kezinde hırýrgter balanyń aǵzasynan 25 magnıt aldy.
Arada birneshe saǵat ótkende qabyldaý bólimine 2,5 jastaǵy taǵy bir bala jetkizilgen. Ol qusý men ishiniń aýyrsynýyna shaǵymdanǵan. Tekserýden keıin dárigerler oǵan da shuǵyl ota jasap, aǵzasynan 9 magnıt alyp shyqty. Otadan keıin bala 10 kún statsıonarda em qabyldady.
— Úshinshi bala sol kezekshilik kezinde tańǵa jýyq, kezekshilik aıaqtalar tusta tústi. Jasy 4-ke tolmaǵan. Іshi qatty aýyryp, álsizdik pen qusý belgileri baıqaldy. Tekserý barysynda asqazan-ishek jolynan kóptegen bógde zat anyqtaldy. Balanyń ash isheginen 59 magnıt alyp shyqqan kezde mundaı jaǵdaı dárigerlerdiń ózin tańǵaldyrdy. Medıtsınalyq kómekke júgingen sátte qaýipti zattar ash ishektiń qabyrǵasyn tesip úlgergen. Bul 1 tamyzdaǵy kezekshilik kezinde jasalǵan eń kúrdeli otalardyń biri boldy, — dedi Balalar shuǵyl medıtsınalyq kómek kórsetý ortalyǵy qabyldaý bóliminiń hırýrgi Aıbol Sultanbekov.
Dárigerlerdiń aıtýynsha, jyl basynan beri ortalyqqa magnıt jutyp qoıǵan 15 bala jetkizilgen. Mundaı jaǵdaı asa qaýipti. Óıtkeni birneshe magnıt aǵza ishinde bir-birine tartylyp, ishki aǵzalardy zaqymdap, aýyr zardaptarǵa ákelýi múmkin.
Dárigerler ata-analardy magnıtti sharıkter men osyǵan uqsas oıynshyqtardy kishkentaı balalardyń qoly jetetin jerge qoımaýǵa shaqyrdy. Sondaı-aq balalardyń qandaı zattarmen oınap júrgenin únemi qadaǵalaý qajettigin eskertti.
Eske salaıyq, buǵan deıin Almatyda bala jutyp qoıǵan úsh magnıt asqazan men ishekti jalǵap jibergenin jazǵanbyz.
