Almatyda bıyl kólikti mas kúıinde júrgizgen 2 myńǵa jýyq adam ustaldy
ALMATY. KAZINFORM – Almatyda jyl basynan beri mas kúıinde kólik basqarǵany úshin 1 890 júrgizýshi ustaldy. Bul týraly Almaty qalasy Polıtsııa departamentiniń resmı ókili Saltanat Ázirbek málimdedi.
Onyń aıtýynsha, jyl basynan beri Almatyda 3 869 jol-kólik oqıǵasy bolyp, saldarynan 4 211 adam zardap shekken. Polıtsııa ókili jol apattarynyń negizgi sebebi retinde kólik quraldarynyń kóptigin atap ótti. Búgingi kúni Almatyda 650 889 avtomobıl tirkelgen, al kún saıyn megapolıske óńirlerden 550 000-ǵa deıin kólik kiredi.
– Jyl basynan beri barlyǵy 3 420 483 ret jol qozǵalysy erejelerin buzylǵan. Mas kúıinde kólik quraldaryn basqarǵany úshin 1 890 júrgizýshi ustaldy, 2 846 adam júrgizýshi kýáliginen aıyryldy, al 6 000-nan astam kólik quraly, onyń ishinde 1 700 moped arnaıy turaqqa qoıyldy, - dedi ol.
Sondaı-aq Saltanat Ázirbek Almaty kóshelerinde mopedshiler men skýterlerdi paıdalanýshylardy baqylaýdy kúsheıtý úshin kún saıyn reıdter júrgizetin 8 mototsıkl ekıpajy patrýlge shyǵatynyn aıtty. Jalpy jyl basynan beri 31 894 moped júrgizýshisi jáne 28 762 skýter paıdalanýshysy ákimshilik jaýapkershilikke tartylǵan.
– Mopedter 743 jol-kólik oqıǵasyna ushyrap, 757 adam zardap shekti, 14 adam qaza tapty. Elektr skýterlerden 103 JKO boldy, sonyń saldarynan 109 adam jaraqat aldy. Qýanyshqa oraı, qaza tapqandar joq. Mototsıklderden 19 apat tirkelip, 19 adam zardap shegip, 2 adam qaza tapty, - dedi polıtsııa ókili.
Aıta ketken jón, 3 qazan kúni Qazaqstan Respýblıkasynyń Prezıdenti Qasym-Jomart Toqaev moped ıelerin júrgizýshi kýáligin alýǵa jáne kólik quraldaryn tirkeýge mindetteıtin zańǵa qol qoıdy.
Tirkelý úshin moped ıelerine kelesi qujattardy usyný kerek:
– Jeke basty kýálandyratyn qujat (nemese tsıfrlyq qujattar servısi arqyly elektrondyq nysanda);
– Salyq kodeksiniń 553 jáne 615-baptarynda kózdelgen KQTK jáne MTNB bergeni úshin tirkeý alymy men memlekettik bajdardyń tólengenin rastaıtyn qujattar;
– Eger bar bolsa, tehnıkalyq qujat nemese ashyq kózderden alynǵan mopedtiń tehnıkalyq sıpattamalary týraly málimetter;
– Menshik ıesiniń ótinishi;
– Kólik quralyn tekserý aktisi.
Moped ramasynyń nómiri bolmaǵan jaǵdaıda, sáıkestendirý nómirin tirkeýge deıin moped ıesiniń ótinishi boıynsha ýákiletti organ beredi.
Eske salaıyq, buǵan deıin Óskemende jol apatynan zardap shekken moped júrgizýshileriniń jartysy – kámeletke tolmaǵandar ekenin jazǵanbyz.
