Almatyda bıyl qansha sábı dúnıege keldi
ALMATY. KAZINFORM — Almatyda 2026 jyldyń basynan beri 17 498 sábı ómir esigin ashty.
«Azamattarǵa arnalǵan úkimet» memlekettik korporatsııasynyń Almaty qalalyq fılıalynyń málimetinshe, olardyń 9 116-sy — ul bala, al 8 382-si — qyz bala.
— Megapolıstegi demografııalyq ósim turaqty qarqynmen jalǵasyp jatyr. Jańa týǵan náresteler sanynyń jyl saıyn artýy qala halqynyń tabıǵı ósiminiń joǵary ekenin kórsetedi, — dep habarlady korporatsııa fılıalynan.
Bıyl almatylyq ata-analar ul balalaryna kóbine Alan, Alıhan jáne Muhammed esimderin qoısa, qyz balalar arasynda Aılın, Asylym jáne Tomırıs esimderi eń tanymal esimder qatarynan kóringen.
Eske salaıyq, qazirgi tańda balanyń týýyn tirkeý rásimi birneshe tásil arqyly júzege asyrylady. Sábı dúnıege kelgennen keıin bir táýlik ishinde ananyń telefon nómirine 1414 qysqa nómirinen quttyqtaý SMS-habarlama jiberilip, qajetti málimetter suratylady. Osylaısha qyzmetti proaktıvti formatta rásimdeýge bolady.
Sonymen qatar týý týraly kýálikti ekinshi deńgeıli bankterdiń mobıldi qosymshalary, elektrondyq úkimet portaly jáne Halyqqa qyzmet kórsetý ortalyqtary arqyly da alýǵa múmkindik bar.
— Memleket tarapynan jańa týǵan nárestelerge birjolǵy járdemaqy tólenedi. Birinshi, ekinshi jáne úshinshi balaǵa 38 aılyq eseptik kórsetkish (AEK) kóleminde, al tórtinshi jáne odan keıingi balalarǵa 63 AEK mólsherinde tólem qarastyrylǵan. Egizder, úshemder nemese tórtemder dúnıege kelgen jaǵdaıda járdemaqy ár balaǵa jeke taǵaıyndalady, — dep túsindirdi «Azamattarǵa arnalǵan úkimet» fılıaly.
Buǵan deıin bala týýǵa baılanysty járdemaqyny eń kóp rásimdeıtin óńirler belgili boldy.
