Almatyda bıyl qansha mektep pen balabaqsha salynady
ALMATY. KAZINFORM — Almatyda kóptegen bilim berý nysandarynyń qurylysy júrip jatyr. Bul týraly Qurylys basqarmasynyń basshysy Nurbol Nursaǵatov málimdedi.
Onyń aıtýynsha, Almatyda 1 930 oqýshy ornyna arnalǵan 5 jańa mektep pen 800 balaǵa arnalǵan 3 balabaqshanyń qurylysy júrip jatyr. Sonymen qatar qalada eki Oqýshylardyń shyǵarmashylyq ortalyǵy men «Alǵabas» shaǵyn aýdanynda kolledj boı kóteredi.
Odan bólek búginde № 16, № 112 jáne № 170 mektepterge qosymsha ǵımarattar salynyp jatyr. Olar paıdalanýǵa berilgennen keıin taǵy 900 oqýshy orny ashylmaq. Jalpy 10 mektep pen 2 balabaqshada qaıta jańǵyrtý jáne seısmıkalyq kúsheıtý jumystary júrgizilýde.
— Jyl basynan beri Almatyda 7 bilim berý nysany paıdalanýǵa berildi. Qalǵan 15 nysandy jyl sońyna deıin aıaqtaý josparlanyp otyr. Onyń ishinde «Zerdeli» shaǵyn aýdanynda jáne Eńbek kóshesinde jalpy 890 oryndyq eki mektep, № 16, № 112 jáne № 170 mektepterge 900 oryndyq úsh qosymsha ǵımarat, toǵyz mektepti qaıta jańǵyrtý jáne seısmıkalyq kúsheıtý, sondaı-aq Tilendıev kóshesinde balabaqsha salý kózdelgen, — dedi basqarma basshysy.
Nurbol Nursaǵatov 14 bilim berý nysany boıynsha jobalyq-smetalyq qujattama ázirlenip jatqanyn atap ótti. Bul jumystar jyl sońyna deıin aıaqtalýy tıis. Sonymen qatar № 87 mektepke 300 oryndyq qosymsha ǵımarat salý jáne № 112 mektepti qaıta jańǵyrtý jobalary memlekettik saraptamanyń oń qorytyndysyn alǵan. Atalǵan nysandardaǵy qurylys-montaj jumystary qazan aıynda bastalady.
Vedomstvo basshysy 2027 jyldyń sońyna deıin Almatyda 31 bilim berý uıymyn jańǵyrtý josparlanǵanyn aıtty.
Eske salaıyq, buǵan deıin 2026–2027 oqý jylynan bastap ne ózgeretinin jazǵanbyz.
