Almatyda bıyl qansha adam koronavırýspen aýyrdy

ALMATY. KAZINFORM – Almatyda 2025 jylǵy 2 jeltoqsanǵa taman koronavırýspen aýyrǵandar byltyrǵydan 19% azaıdy.

Almaty sanıtarııalyq-epıdemıologııalyq baqylaý departamenti basshysynyń orynbasary Ásel Qalyqovanyń málimetinshe, jyl basynan beri qaladaǵy zerthanalarda 314 koronavırýs ınfektsııasy tirkelgen. 

Aýrýshańdyq kórsetkishi 100 myń adamǵa shaqqanda 13,6 boldy, byltyr bul kórsetkish 16,8 deńgeıinde bolyp, 374 naýqas anyqtalǵan edi. Bıyl tirkelgenderi dárigerge óz betimen kelip qaralǵan kezde anyqtalǵan, olardyń bári der kezinde medıtsınalyq kómek alǵan.

Naýqastardyń basym bóligi – shamamen 70%-y – 14 jasqa deıingi balalar. Ekinshi toby – 60 jastan asqan adamdar (18,8%).

– Aýrýy anyqtalǵan naýqastardyń qurylymyna qaraǵanda, olardyń kópshiligi mektepke deıingi jastaǵy balalar (63,4%). Odan keıingi orynda – zeınetkerler (16,6%), jumyssyzdar (5,7%), túrli uıym men JShS qyzmetkerleri (2,6%), sondaı-aq mektep oqýshylary (3,2%) tur. Balalar kóp qozǵalady, kóp júredi, indettiń ár maýsymda asqynatyny taǵy bar. Sarapshylar muny osyndaı jaǵdaımen baılanystyryp otyr, - dedi Ásel Qalyqova.

Dárigerler koronavırýstyń aldyn alý da tumaý men JRVI-den qorǵanýǵa uqsas ekenin eske saldy. 

Aýrýdyń asqyný qaýpin edáýir tómendetetin negizgi qorǵanys tásili – vaktsınatsııa. Sondaı-aq turǵyndar adam kóp jınalatyn jerde maska taǵyp, naýqastarmen baılanystan aýlaq bolyp, úı-jaıdy jıi jeldetip otyrýy kerek. Qoldy jıi jýyp, antıseptık qoldanyp, tazalyqqa mán berý de derttiń asqynýyn az da bolsa tejeıdi. 
Dene qyzýy kóterilip, jótel paıda bolyp, tamaq aýyryp nemese tynys alý qıyndaı bastasa, maska taǵyp, dereý dárigerge qaralǵan jón.

Eske salaıyq, buǵan deıin Almatyda tumaý men JRVI boıynsha maýsymdyq ósim saqtalǵanymen, jedel járdem shaqyratyndar azaıǵanyn jazǵanbyz.