Almatyda bıyl qandaı jańa saıabaq salynady
ALMATY. KAZINFORM – Almatyda bıyl jańa qoǵamdyq keńistikterdiń qurylysy bastalady.
Kazinform agenttiginiń saýalyna jaýap bergen Almaty qalasy qoǵamdyq keńistikterdi damytý basqarmasy 2026 jyly qalada jańa skver men saıabaqtar salynyp, turǵyndardyń súıikti ornyna aınalǵan keı qoǵamdyq keńistikter jóndeýden ótetin habarlady.
Vedomstvo málimetinshe, osy jyly Naýryzbaı aýdanynda Alataý dańǵylynyń shyǵysy men Abaı dańǵylynyń soltústiginde ornalasqan aýmaqta jańa skverdiń qurylysy bastalady. Joba jergilikti bıýdjet qarajaty esebinen júzege asyrylady.
Odan bólek Alataý aýdanynda da jańa saıabaq salynady. Ol “Daraboz” shaǵyn aýdanynda, Baýyrjan Momyshuly kóshesiniń boıynda ornalaspaq. Qazir onyń jobalaý-smetalyq qujattama ázirlenip jatyr.
Buǵan deıin qala ákimdigi bul jobany qarjylandyrýǵa iri qurylys kompanııalarynyń biri 6 mlrd teńgeden astam qarjy quıýdy josparlap otyrǵanyn habarlaǵan bolatyn.
Alaıda qoǵamdyq keńistikterdi damytý basqarmasy jańa jospar boıynsha jobany iske asyrý úshin jergilikti bıýdjetti qoldanylatyn naqtylady.
– Saraptamanyń oń qorytyndysy alynǵannan keıin basqarma atalǵan jobany qarjylandyrý úshin bıýdjettik ótinim joldaıtyn bolady. Qarajat bólingen jaǵdaıda qurylys-montaj jumystary 2026–2027 jyldary júzege asyrylady, - delingen vedomstvo jaýabynda.
Sonymen qatar bıyl Almaty qalasynyń Tuńǵysh Prezıdent saıabaǵyn jańartý jumystary bastalýy múmkin. Alaıda vedomstvo jobalaý-smetalyq qujattama áli ázirlenbegenin jáne qurylys-montaj jumystarynyń ýaqyty men quny belgilenbegenin málimdedi. Byltyr Tuńǵysh Prezıdent saıabaǵy demeýshiler esebinen jańartylyp, qurylys jumystary 2026 jyly bastalatyny aıtylǵan edi.
Qala turǵyndarynyń súıikti demalys ornyna aınalǵan bul saıabaq 2010 jyly ashyldy. Ol Bostandyq aýdanynda, ál-Farabı dańǵyly men Navoı kóshesiniń qıylysynda ornalasqan. Jalpy aýmaǵy – shamamen 73 gektar. Munda fontan kesheni, sándik gúlzarlar, serýen joldary, sport jáne balalar alańdary bar.
Eske salaıyq, byltyr Almaty qalasynda birneshe jańa qoǵamdyq keńistik paıda boldy. Nazarbaev dańǵyly men Gandı kóshesiniń qıylysynda, burynǵy Prezıdent rezıdentsııasy ornynda saıabaq salyndy. Skver aýmaǵynda kólemdi toǵan bar. Ol qysta muz aıdyny retinde paıdalanylyp jatyr. Sondaı-aq munda órtengen rezıdentsııanyń bir qabyrǵasyn kórýge bolady.
Sondaı-aq Saıran kóliniń jaǵalaýy abattandyrylyp, paıdalanýǵa berildi. Al kól ortasynda qalqymaly kópir salyndy. Biraq qysqy kezeńde jańadan ornatylǵan kópirler bólshektelip, ýaqytsha alynyp tastaldy.