Almatyda bıyl qandaı mamandyqtarǵa suranys artty
ALMATY. KAZINFORM — Almatyda birqatar mamandyqqa suranys artsa, keı salalarda jumys oryndary azaıǵan.
Almaty qalasy Eńbek mobıldiligi ortalyǵynyń málimetine sáıkes, 2025 jyly jumys berýshiler tarapynan eń suranysqa ıe mamandyqtar qataryna: muǵalim, býhgalter, býhgalterdiń kómekshileri, tárbıeshiler, meıirbıkeler, sanıtarlar, aýla sypyrýshylar engen.
Almaty qalasy boıynsha jyl basynan beri Enbek.kz saıtyna 18 869 túıindeme ornalastyryldy. Sonyń ishinde almatylyqtar — býhgalter, medıtsına qyzmetkerleri, muǵalim, tárbıeshi, zańger, mektep psıhologtary, ártúrli jumys atqaratyn jumysshy syndy vakansııalardy jıi izdegen.
— 2025 jyly eńbek naryǵynda qyzmet kórsetý, logıstıka, IT salasy, medıtsına jáne qurylys salasy boıynsha suranys ósimi baıqalady. Sonymen qatar jastar praktıkasy men ýaqytsha jumyspen qamtý jobalaryna qyzyǵýshylyq artty. Odan bólek onlaın jumys formattary men qysqa merzimdi kýrstarǵa qyzyǵýshylyq ósti, — dep habarlady ortalyqtan.
Al kerisinshe keńse ákimshiligi (is júrgizýshi, ofıs-menedjer), dástúrli satý menedjeri jáne kassır qyzmeti, kúzet, sondaı-aq bank bólimsheleriniń operatorlary boıynsha Almaty qalasynyń eńbek naryǵynda suranys tómendegen.
— Bul tsıfrlandyrý, avtomattandyrý jáne onlaın qyzmetterdiń keńeıýimen baılanysty, — dep túsindirdi Eńbek mobıldiligi ortalyǵynyń mamandary.
Almatylyqtar qandaı jalaqy suraıdy
Eńbek mobıldiligi ortalyǵy usynǵan málimetke sáıkes, Almatyda jumys izdeýshiler orta eseppen keminde 320 000 teńge jalaqy suraıdy.
Al jarııalanǵan habarlandyrýlar arasynda qazir jalaqysy joǵary mamandyqtar qataryna: qarjy dırektory, dırektordyń orynbasary, bólim basshylary — ortasha jalaqysy shamamen 930 000 tg, IT-mamandary — 900 000 tg, marketologtar — 650 000 tg jáne basqa da jumys oryndary endi.
Buǵan deıin Ortalyq kommýnıkatsııalar qyzmeti alańynda ótken brıfıng kezinde Almaty ákimi Darhan Satybaldy almatylyqtardyń ortasha jalaqysy 539 myń teńgege jetkenin aıtqan edi. Bul — respýblıkalyq ortasha deńgeıden 29%-ǵa joǵary.