Almatyda bıyl esirtki qylmysyna qatysy bar 28 sheteldik jaýapqa tartyldy

ALMATY. KAZINFORM – Almaty qalasynda jyl basynan beri 600 esirtki qylmysy anyqtaldy.

Qalalyq polıtsııa departamentiniń málimetinshe, esirtkige qatysty 600 derektiń 260-y tyıym salynǵan zatty satý faktilerine jatady. Jalpy 440-tan astam adam, sonyń ishinde 28 sheteldik azamat qylmystyq jaýapkershilikke tartylǵan.

– Biz esirtki qylmysynyń barlyq túrin tirkep otyramyz. Sonyń ishinde jasyryn qoımalar men elektrondy tólemder arqyly júzege asatyn baılanyssyz taratý tásilderi de bar. Osy kezeńde 91 esirtki taratýshy ustaldy. Sonymen qatar sıntetıkalyq esirtki daıyndaıtyn eki zerthana joıylyp, olardan qomaqty somaǵa baǵalanatyn jabdyqtar tárkilendi, - dedi Almaty qalasy Esirtki qylmysyna qarsy is-qımyl basqarmasynyń bastyǵy Murat Jumabaev.

Odan bólek qarjy uıymdarymen birlesken jumystyń nátıjesinde 1,5 myńnan astam bank kartasy jáne 1 myńnan asa krıptámııan buǵattalǵan. Zańsyz aınalymmen baılanysy bar 68 mıllıon teńgeden asatyn qarjy operatsııalary toqtatylǵan.

– Polıtsııa esirtkige qarsy profılaktıkaǵa da basa nazar aýdaryp otyr. Jyl basynan beri oqý oryndarynda 950-ge jýyq profılaktıkalyq is-shara ótkizildi. Aqparattyq platformalarda, buqaralyq aqparat quraldarynda jáne qaladaǵy LED-ekrandarda 1 400-den astam nashaqorlyqqa qarsy materıal ornalastyryldy, - dedi Murat Jumabaev.

Eske salaıyq, buǵan deıin Almatyda uıymdasa esirtki taratqandar ustaldy.