Almatyda bıyl eski úılerden qansha adam kóshirildi

ALMATY. KAZINFORM – Almatyda qalanyń turǵyn úılerin jańartý baǵdarlamasy júrip jatyr.

Almaty ákiminiń orynbasary Beıbit Shahanovtyń aıtýynsha, 2025 jyldyń 9 aıynda baǵdarlama aıasynda 390 adam eski úıden kóshirilgen. Keıbir turǵyndarǵa jańa páter berilse, qalǵandaryna úıleriniń naryqtyq baǵasyna saı aqsha tólengen. Atap aıtqanda:

• Túrksib aýdanynda – 127 adam;

• Jetisý aýdanynda – 107 adam;

• Almaly aýdanynda – 58 adam;

• Alataý aýdanynda – 42 adam;

• Áýezov aýdanynda – 26 adam;

• Medeý aýdanynda – 18 adam;

• Bostandyq aýdanynda – 12 adam.

Beıbit Shahanovtyń Almatyda jyl basynan beri apatty jaǵdaıda turǵan 12 ǵımarat súrilgenin atap ótti. Osy jyldyń sońyna deıin taǵy 6 ǵımarat buzý josparlanǵan. Sondaı-aq eski úıden kóshirilgen adamdardyń sany 667-ge deıin jetkizilmek.

- Turǵyn úılerdi jóndeý – bul jaı ǵana eski ǵımarattardy buzý emes, bul qalanyń ekologııasyn jańartý jáne almatylyqtardyń ómir súrý sapasyn jaqsartýǵa baǵyttalǵan keshendi jumys, – dedi ol.

Sonymen qatar qala ákiminiń orynbasary úı kezeginde turǵan jáne jaldamaly páter kútip júrgen azamattarǵa erekshe kóńil bólinetinin aıtty.

Onyń sózinshe, keıingi jyldary qalada turǵyn úı qurylysy belsendi júrip jatyr.

- Qazir «Qalqaman-2» shaǵynaýdanynda 594 páterli 7 úı salynyp jatyr. Kezekte turǵan azamattar kelesi jyly jańa páter alady, – dedi Beıbit Shahanov.

Memlekettik jaldamaly turǵyn úı baǵdarlamasy boıynsha búginge deıin 885 páter satyp alynǵan. Jyl sońyna deıin taǵy 2 265 páter alý josparlanyp otyr.

Eske salaıyq, buǵan deıin Almatyda qansha eski úı súriletinin jazǵanbyz.