Almatyda bıyl jasandy uryqtandyrýǵa 3241 kvota bólindi
ALMATY. KAZINFORM — Ekstrakorporaldy uryqtandyrý baǵdarlamasy boıynsha 2024 jylǵa 3241 kvota bólindi. Bul týraly «Áleýmettik medıtsınalyq saqtandyrý qory» KEAQ Almaty fılıaly dırektory Tileýhan Ábildaev aıtty.
Onyń aıtýynsha, MÁMS aıasynda halyqqa qoljetimdi bolǵan qyzmettiń biri — ekstrakorporaldy uryqtandyrý nemese EKU protsedýrasy.
«Bıyl Almatyda mindetti áleýmettik medıtsınalyq saqtandyrý aıasynda EKU baǵdarlamasyna 3,8 mlrd teńge bólindi. Atalǵan somaǵa barlyǵy 3241 jasandy uryqtandyrý protsedýrasy jasalýy tıis. Bıyl ońtústik astana boıynsha medıtsınalyq saqtandyrý qorymen kelisimshart bekitken 8 klınıka jumys isteıdi. Olardyń tizimin Qordyń fms.kz resmı saıty arqyly tanysýǵa bolady», — fılıal dırektory.
Baǵdarlamaǵa erli-zaıyptylar ǵana emes, resmı nekege turmaǵan juptar da qatysa alady. Mundaı jaǵdaıda eki jaqtyń ózara jazbasha kelisimi qajet.
«Jasandy uryqtandyrý baǵdarlamasy 2020 jyldan beri mindetti áleýmettik medıtsınalyq saqtandyrý paketi arqyly qarjylandyrylady. Baǵdarlamaǵa qatysqysy keletin patsıent mindetti túrde saqtandyrylǵan bolýy shart», — dep atap ótti Tileýhan Ábildaev.
