Almatyda bıyl demalys kúnderi ótetin jármeńkeler sany 2,5 ese artady
ALMATY. KAZINFORM — Almaty ákimdigi demalys kúnderi ótetin jármeńkeler jelisin keńeıtýdi josparlap otyrǵanyn habarlady.
Qala ákimdiginiń málimetinshe, jármeńkelerdi «Almaty» áleýmettik-kásipkerlik korporatsııasy» AQ uıymdastyrady. 2025 jyly qalanyń Almaly, Áýezov, Bostandyq, Jetisý jáne Medeý aýdandarynyń aýmaǵynda 430 jármeńke ótkizilgen.
— Bıyl jármeńkeler sanyn 2,5 esege ulǵaıtý kózdelip otyr. Osyǵan baılanysty 2026 jyldyń sońyna deıin 1000-nan astam jármeńke ótkizý josparlanǵan, — dep habarlady ákimdikten.
Sonymen qatar 2026 jyldyń ishindp Túrkistan, Jetisý, Almaty, Jambyl, Qaraǵandy, Shyǵys Qazaqstan, Abaı oblystarynyń, sondaı-aq Ózbekstan men Tájikstan fermerleri qatysatyn keńeıtilgen aýyl sharýashylyǵy jármeńkelerin uıymdastyrý qarastyrylǵan. Almaty ákimdigi jańa pisken kókónis ónimderin jetkizýge basymdyq beriletinin atap ótti.
Demalys kúngi jármeńkeler ótetin mekenjaılar:
* Almaly aýdany — Masanshy kóshesi (Gogol kóshesi men Áıteke bı kóshesiniń aralyǵy);
* Áýezov aýdany — Ótegen batyr kóshesi (Abaı dańǵylynan tómen);
* Bostandyq aýdany — «Qazaqfılm» shaǵyn aýdany, Isınalıev kóshesi;
* Jetisý aýdany — «Qulager» shaǵyn aýdany, HQKO men ákimdik ǵımaraty arasyndaǵy avtoturaq;
* Medeý aýdany — Meńdiqulov býlvary (Bekturov kóshesiniń qıylysy).
Eske salaıyq, buǵan deıin Áýezov jáne Bostandyq aýdandarynda demalys kúnderi ótetin jármeńkeler úsh kúndik jumys formatyna kóshti.