Almatyda bıyl áıelderge qatysty 7 myń qylmys tirkelgen
ALMATY. KAZINFORM - Almatyda 2024 jyldyń 10 aıy boıynsha áıelderdi zorlyq-zombylyqtan qorǵaý jónindegi toptyń jumysy qorytyndylandy. Brıfıngke «Daǵdarys ortalyqtary odaǵy» zańdy tulǵalar birlestiginiń basqarma tóraǵasy Zýlfııa Baısakova jáne Almaly aýdany Polıtsııa basqarmasynyń áıelderdi zorlyq-zombylyqtan qorǵaý bólimshesiniń aǵa ınspektory, polıtsııa maıory Aıgerım Kýlasbekova qatysty.
Usynylǵan polıtsııanyń málimetine sáıkes, 2024 jyldyń 10 aıynda Almatyda áıelderge qatysty 7705 qylmys tirkelgen, bul ótken jyldyń sáıkes kezeńimen salystyrǵanda 8,1%-ǵa az.
- Bıyl biz otbasylyq-turmystyq zorlyq-zombylyqtyń aldyn alý boıynsha jumysty kúsheıttik. Profılaktıkalyq esepke 6800-den astam adam qoıyldy, 6200-den astam qorǵanys uıǵarymdary shyǵaryldy. Aıta ketý kerek, bul sharalar tek quqyq buzýshylyqtardyń jolyn kesýdi ǵana emes, sonymen birge zardap shekkenderge kómek kórsetýdi kózdeıdi. «Seriktestik-turmystyq zorlyq-zombylyqtyń aldyn alý quraly» pılottyq jobasy aıasynda 105 er adam psıhokorrektsııalyq baǵdarlamalarǵa jiberildi, - dedi polıtsııa ókili.
Sondaı-aq ol aqparattyq-túsindirý jumystaryna erekshe kóńil bólingenin atap ótti. 2024 jyly qalanyń oqý oryndary men uıymdarynda 160 dáris, trenıngter men kezdesýler ótkizilgen, olarǵa 1000-nan astam turǵyn qatysty.
Sonymen qatar áıelderdi zorlyq-zombylyqtan qorǵaý jónindegi ınspektorlar 776 áıelge konsýltatsııalyq kómek kórsetken. Daǵdarys ortalyqtaryna 150 áıel jiberilse, olardyń 45-i balalarymen birge «Jan-Saıa» daǵdarys ortalyǵyn panalady, 9 áıel «Analar úıi» baspanasynan qoldaý tapty.
- Áıelderge qatysty zorlyq-zombylyqpen kúresý - bul quqyq qorǵaý organdarynyń mindeti ǵana emes, sonymen birge qoǵamnyń jalpy jaýapkershiligi. Daǵdarys ortalyqtarymen, úkimettik emes uıymdarmen jáne memlekettik organdarmen birlesip biz zardap shekkenderdiń aldyn alýǵa jáne olarǵa kómek kórsetýge baǵyttalǵan belsendi jumysty jalǵastyramyz, - dedi Zýlfııa Baısakova.
Eske salaıyq, buǵan deıin Almaty oblysynda balǵamen áıeliniń basyn jarǵan er adam ustalǵanyn jazǵanbyz.