Almatyda bıyl 62 bala kókjótel juqtyrǵan

ALMATY. KAZINFORM — Almaty qalasynda 2024 jyldyń 8 aıynda 14 jasqa deıingi ekpe almaǵan balalar arasynda kókjóteldiń 62 rastalǵan jaǵdaıy tirkeldi. Bul týraly Almaty qalasynyń sanıtarııalyq-epıdemıologııalyq baqylaý departamentiniń basshysy Qasymhan Alpysbaıuly aıtty.

— Kókjótel juqtyrǵan 62 balanyń 35-i (56,4%) kókjótelge qarsy ekpeden bas tartqan. Al 14-i (22,5%) medıtsınalyq qarsy kórsetilimderge baılanysty almaǵan, 10-y (16,1%) vaktsınatsııa jasyna jetpegen, 3-ýi (4,8%) ekpeniń tolyq vaktsınatsııa kýrsymen qamtylmaǵanyna baılanysty aýrý juqtyrǵan. Olarmen baılanysta bolǵan 373 adam tekserildi, nátıjesi — teris, — dedi departament basshysy.

Qasymhan Alpysbaıulynyń aıtýynsha, kókjótel ásirese ómirdiń alǵashqy aılaryndaǵy balalarǵa qıyn.

Sondaı-aq kókjótel ókpeniń qabynýy (pnevmonııa), mıdyń zaqymdanýy sııaqty asqynýlarmen qaýipti.

SEBD basshysy kókjótelden qorǵaýdyń jalǵyz senimdi jáne tıimdi ádisi — vaktsınatsııa ekenin atap ótti.

Eske salaıyq, buǵan deıin Almatyda 17 myńǵa jýyq qyzǵa adam papılloma vırýsyna qarsy ekpe salynatynyn jazǵanbyz.