Almatyda bıyl 600-ge jýyq adam qyzylsha juqtyrǵan
ALMATY. KAZINFORM — Almatynyń bas sanıtarııalyq dárigeri Qasymhan Alpysbaıuly qaladaǵy qyzylsha aýrýy boıynsha epıdaýhal jaǵdaıyn túsindirdi.
Onyń aıtýynsha, Almatyda jyl basynan beri qyzylsha juqtyrǵan 591 adam tirkelgen. Eń kóbi Alataý aýdanynda — 239, sondaı-aq Naýryzbaı, Bostandyq pen Áýezov aýdandarynda da bar. Aýrýǵa shaldyqqandardyń 89 paıyzy qyzylshaǵa qarsy egilmegen jáne 94 paıyzy 14 jasqa deıingi balalar.
— Almaty qalasynda qyzylsha boıynsha epıdemıologııalyq jaǵdaı kúrdeli kúıinde qalyp otyr. 2026 jyldyń basynan beri biz 591 rastalǵan jaǵdaıdy tirkedik, aýrýshańdyq ulǵaıyp barady. Infektsııanyń taralýyna vaktsınatsııanyń bolmaýy negizgi sebep bolyp otyr, — dedi ol.
Qasymhan Alpysbaıuly aýrýdyń barlyq oshaǵynda jedel túrde epıdemııaǵa qarsy is-sharalar júrgizilgenin atap ótti. Aýrý juqtyrǵandarmen baılanysta bolǵan 6 myńnan astam adam medıtsınalyq baqylaýǵa alynsa, 700-den astam adam epıdkórsetkish boıynsha vaktsınatsııalandy.
— Almatyda balalardy tolyqtyrý men qosymsha ımmýndaý jumysy qolǵa alyndy. Bir jas pen alty jasta, sondaı-aq buryn ekpe almaǵan 18 jasqa deıingi balalardy jáne 6 aıdan 10 aıǵa deıingi sábılerdi qosymsha josparly vaktsınalaý jumysy júrgizilip jatyr. Jyl basynan beri qyzylshaǵa qarsy 7 myńnan astam bala ekpe aldy, — dedi Almatynyń bas sanıtarııalyq dárigeri.
Eske salaıyq, elde qyzylshaǵa qarsy vaktsınatsııa kúsheıtildi.
