Almatyda bıyl 42 júk kóligi aıyppul turaǵyna qoıyldy
ALMATY. KAZINFORM — Almatyda tehnıkalyq aqaýy bar júk kólikterine baqylaý kúsheıtildi.
Qalalyq polıtsııa departamentiniń málimetinshe, 2026 jyldyń 7 aı ishinde 16 myńnan astam júk kóligi júrgizýshisi ákimshilik jaýapkershilikke tartyldy. Onyń ishinde 1 033 tehnıkalyq aqaýy bar kólik anyqtalǵan. Ekologııalyq talaptardy buzǵany úshin 229 júrgizýshi jaýapkershilikke tartylsa, 42 júk kóligi aıyppul turaǵyna qoıylǵan.
Al shilde aıynyń ortasynan beri jumys istep jatqan mamandandyrylǵan mobıldi top 428 jol qozǵalysy erejesin buzý deregin anyqtap, 21 júk kóligin aıyppul turaǵyna jetkizdi.
— Jolǵa shyǵatyn árbir júk kóligi Qazaqstan Respýblıkasynyń qaýipsizdik jáne ekologııalyq talaptaryna tolyq sáıkes kelýi tıis. Aqaýly tejegish júıesi, tozǵan shınalar nemese paıdalanylǵan gazdyń shamadan tys tútindeýi — aýyr zardaptarǵa ákelýi múmkin naqty qaýip faktorlary. Bizdiń mindetimiz — mundaı kólik quraldaryn der kezinde anyqtap, olardyń ári qaraı paıdalanylýyna jol bermeý, — dep habarlady departamentten.
Almaty qalasynda jalpy 48 myńnan astam júk kóligi tirkelgen.
Eske salaıyq, Almatyda bilikke túsetin júktemesi 8 tonnadan asatyn júk kólikteriniń qozǵalysyna kúndiz shekteý qoıyldy. Ol kún saıyn saǵat 07:00–den 22:00–ge deıin Saın kóshesi — Ál-Farabı dańǵyly — Shyǵys aınalma avtomobıl joly (ShAAJ) — Rysqulov dańǵyly aralyǵyndaǵy aýmaqta qoldanylady.
