Almatyda bıyl 4 myńnan astam sheteldik jaýapqa tartyldy
ALMATY. KAZINFORM – Almatyda shetel azamattarynyń kóshi-qon zańnamasyn buzý derekterine nazar aýdaryldy.
Qalalyq Polıtsııa departamentiniń resmı ókili Saltanat Ázirbektiń aıtýynsha, Almaty – týrıster men mıgranttar úshin tartymdy ortalyqtyń biri. Qazir qalada 72 myńnan astam shetel azamaty kóshi-qon esebinde tur. Olardyń 54 myńnan astamy kórshi elderdiń azamattary.
- Jyl basynan beri kóshi-qon zańnamasyn buzǵany úshin 4,3 myńnan astam shetel azamaty ákimshilik jaýapkershilikke tartyldy. Sondaı-aq sheteldik jumys kúshin zańsyz tartqany úshin 92 jumys berýshi jazalandy. Sot sheshimimen 741 adam elden shyǵarylyp, qujaty joq 959 adam jeke basyn anyqtaý úshin qabyldaý-taratý ornyna ornalastyryldy, - dedi ol.
Sonymen qatar shetel azamattaryn qabyldaý erejesin buzǵan 845 jeke jáne zańdy tulǵa jaýapkershilikke tartylǵan. Polıtsııa jataqhana, hostelder men kelýshiler turatyn basqa da oryndardy tekserip otyrady.
Eske salaıyq, buǵan deıin Teńiz kenishinde jumys istegen 30-ǵa jýyq sheteldik elden shyǵaryldy.
